Kërkohet paraburgimi i babasë që dyshohet se e vrau të birin e vet në Prishtinë
16:03
Kërkohet paraburgimi i babasë që dyshohet se e vrau të birin e vet në Prishtinë
Prokuroria Themelore në Prishtinë ka kërkuar nga Gjykata Themelore që të caktohet masa e paraburgimit ndaj S.K., i cili dje dyshohet se e vrau të birin e vet A.K.
Me vendim të Prokurorit të Shtetit i është caktuar ndalimi prej 48 orëve S.K.
Ai akuzohet për vrasje të rëndë dhe mbajtje të paautorizuar të armëve.
“Personi i lartcekur, dyshohet se më 27 janar 2021, rreth orës 17:00, me armë zjarri ka privuar nga jeta personin me inicialet A.K., (djalin e tij), në garazhin e objektit banesor të tyre, nga motive të panjohura deri më tani. I dyshuari, me vendim të Prokurorit të Shtetit gjenden nën masën e ndalimit 48 orësh, ndërsa, trupi i pa jetë është dërguar në Institutin e Mjekësisë Ligjore, në Prishtinë, për obdukim. Prokurori i Shtetit, në koordinim me Policinë e Kosovës, janë duke i ndërmarrë të gjitha veprimet e nevojshme hetimore lidhur me këtë rast”, thuhet në njoftimin e Prokurorisë Themelore të Prishtinës.
13:12
Avokati i Krasniqit thotë se vrasja e djeshme ishte aksidentale
Vrasja e djeshme në Prishtinë ku S.K. vrau djalin e tij A.K. ka ndodhur aksidentalisht.
Kështu ka thënë për KOHËN, avokati i S.K., Ramiz Krasniqi duke shtuar se nuk mund të jap detaje shtesë për momentin.
“Vrasja nuk ka qenë e qëllimshme por ka ndodhur aksidentalisht”, ka thënë avokati Krasniqi.
Ai ka bërë të ditur se gjendja shëndetësore e S.K. është e keqe dhe se ai po mbahet me qetësues.
Dyshohet se S.K. ka vrarë djalin e tij A.K. dje rreth orës 17:00 në rrugën “Ndue Prelleshi” dhe më pas ka informuar policinë për aktin.
Ndërkohë, Policia e Kosovës, në lidhje me këtë rast, ka bërë të ditur se dje është arrestuar i dyshuari mashkull kosovar pasi që i njëjti dyshohet se ka kryer veprën vrasje e rëndë.
Sipas Policisë, në vendin e ngjarjes kanë dalë njësitë relevante policore, prokurori i shtetit, njësia e mjekësisë ligjore dhe ekipi i urgjencës i cili e ka konfirmuar vdekjen e viktimës mashkull kosovar.
“Në vendin e ngjarjes gjithashtu janë gjetur dhe konfiskuar: një revole, një karikator, tre fishek, një gëzhojë dhe një predhë. Me urdhër të prokurorit trupi i pa jetë i viktimës është dërguar në IML për obduksion ndërsa i dyshuari është dërguar në mbajtje”, thuhet në njoftimin e Policisë.
