Me trafik urban pritet të bëhet Komuna e Podujevës. Megjithatë, ky proces është i lidhur me ndërtimin e Stacionit të Autobusëve që ka nisur në fundvitin e kaluar. Aktualisht në këtë komunë nuk ka transport publik urban, por që kjo gjë është paraparë me Rregulloren për transportin rrugor në territorin e Komunës së Podujevës që është miratuar në seancën e fundit të Kuvenit Komunal.
Drejtori për Shërbime Publike, Mbrojtje dhe Shpëtim, Bahri Selimi, ka thënë se ky dokument rregullon transportin e mallrave dhe të personave.
“Është një rregullore e cila ka qenë më herët në fuqi, mirëpo për shkak të ndryshimit të Ligjit të transportit rrugor është dashtë që edhe ne t’i bëjmë disa ndryshime në këtë rregullore. Është rregullorja më e nevojshme për komunën, sepse tash transportuesit e udhëtarëve kërkojnë leje për transport të udhëtarëve, për të paguar taksat komunale, ne nuk po mundemi të bëjmë as njoftimet publike pa e miratuar këtë rregullore. Ka qenë për muajin dhjetor, por pasi nuk pat seancë u shty për këtë kohë”, është shprehur Bahri Selimi.
Por, shefi i Grupit të këshilltarëve të LDK-së, Valon Demolli, ka pyetur nëse është paraparë trafiku urban.
“Sa i përket kësaj rregulloreje, a keni paraparë autobusë urbanë kur e dimë që nuk është funksional as Stacioni i Autobusëve e as Bordi i aksionarëve të Stacionit të Autobusëve, e që është planifikuar që Stacioni i Autobusëve të përfundojë në vitin 2024?”, ka pyetur ai.
Selimi ka theksuar se kjo gjë do të ndodhë me përfundimin e Stacionit të ri të Autobusëve.
“Kjo rregullore e bën rregullimin e gjithë transportit rrugor apo transportit të udhëtarëve dhe mallrave në tërë territorin e Komunës së Podujevës. Ndërsa një pasus i kësaj rregulloreje, paraasheh linjat. Sa i përket transportit urban, ne e kemi paraparë këtë, edhe pse nuk është ende Stacioni i Autobusëve, edhe pse siç e dini Komuna e Podujevës nuk ka trafik urban. Por, kemi parë që domosdoshmëria është rrit shumë që të jetë trafiku urban. Dhe në bazë të rekomandimit për linjat e kemi paraparë-lejohet kur është e nevojshme-por trafiku urban do të jetë funskional me t’u ndërtuar Stacioni”, është shprehur drejtori për Shëbrime Publike, Mbrojtje dhe Shpëtim. “Nuk e di a do të ndërtohet këtë vit apo në 2024, varet tash edhe për shkak të dinamikës së punëve të operatorit edhe buxhetit që ka. Por, në momentin që stacioni do të jetë aktiv edhe trafiku urban do të funksionalizohet, sepse janë caktuar edhe linjat kah do të bëhet qarkullimi i trafikut urban”.
Mbështetje këtij dokumenti i ka dhënë Grupi i këshilltarëve të partisë në pushtet LVV. Shefi i këtij Grupi, Florent Hasani, ka thënë se me këtë rregullore qartësohen kompetencat e komunës në rregullimin e transportit rrugor.
“Ne Grupi i asamblistëve të Vetëvendosjes duke e ditur rëndësinë e transportit të udhëtarëve dhe mallrave brenda kufijve administrativ të komunës për një qasje jodiskriminuese dhe të hapur për treg për shëbime më të mira, pastaj kjo rregullore qartëson edhe kompetenca e komunës në rregullimin e funksionimin e transportit rrugor. Për të gjitha këto arsye ne e mbështesim këtë propozim-rregullore”, ka theksuar Hasani.
Edhe Grupi i këshilltarëve të PDK-së e ka mbështetur këtë propozim-rregullore. Ky dokuemnt është miratuar me shumicë votash.
© KOHA. Të gjitha të drejtat janë të rezervuara.
