Gjini: Jemi populli më i bekuar që kemi mbështetjen e SHBA-së
Ambasadori i Shteteve të Bashkuara të Amerikës në Kosovë, Jeffrey Hovenier, ka vizituar të mërkurën Gjakovën. Ai foli për çështjet që kanë të bëjnë me qytetin, por edhe për Asociacionin. E kryetari i Gjakovës, Ardian Gjini, tha se Kosova është e bekuar që ka mbështetjen e SHBA-së
Bekim për popullin e Kosovës e ka quajtur mbështetjen e SHBA-së kryetari i Gjakovës, Ardian Gjini.
Ai mirëpriti në Gjakovë të mërkurën ambasadorin amerikan, Jeffrey Hovenier, dhe tha se populli i Kosovës i është përjetësisht mirënjohës SHBA-së.
“Më duhet t’ju them që Gjakova, por edhe e gjithë Kosova e ka gëzuar një mbështetje të jashtëzakonshme, mbështetje të cilën pak popuj në botë e kanë gëzuar prej Shteteve të Bashkuara të Amerikës, që prej kohës së luftës edhe menjëherë pas luftës, kur e kemi rindërtuar të gjithë qytetin e djegur, e kemi bërë me ndihmën Shteteve të Bashkuara të Amerikës”, ka thënë Gjini.
Ambasadori amerikan Jeffrey Hovenier tha se bisedoi me Gjinin për këndvështrimin e tij në lidhje me shumë çështje që kanë të bëjnë me qytetin, por edhe me politikën.
“E kam njohur kryetarin pothuajse 15 vjet e më shumë, prej mesit të viteve 2000 dhe edhe atëherë më kujtohet se më pati thënë që vjen prej qytetit më të bukur në Kosovë. Prandaj, me vjen shumë mirë që jam sot këtu, do të kemi mundësinë gjithashtu të bëjmë shëtitje përreth qytetit. Kryetari i Komunës do të na e tregojë Gjakovën si dhe vendin e vet, vendin që Gjakova e zë në Kosovë”, ka thënë Hovenier.
Ambasadori amerikan edhe në këtë paraqitje para mediave përsëriti kërkesën për Qeverinë se duhet të ecë para me formimin e Asociacionit të komunave me shumicë serbe, pa kompetenca ekzekutive.
