Për të pestën herë me radhë, OJQ “Sundimi i Demokracisë në Kosovë (SDK) dhe Iniciativa Qytetare në Orllan kanë organizuar aksionin e dhurimit të gjakut për të shënuar ditën e rënies së heronjve Zahir Pajazitit, Edmond Hoxhës e Hakif Zejnullahut. Ky aktivitet është mbajtur në Kompleksin memorial “Zahir Pajaziti” në fshatin Orllan.
Sipas përfaqësuesit të SDK-së, Rexhep Zeka, gjatë kësaj dite rreth shtatëdhjetë vullnetarë kanë dhuruar gjak në nderim të këtyre heronjve
“Sot në 26 vjetorin e rënies Heroike të Zahir Pajazitit, Hakif Zejnullahut dhe Edmond Hoxhës, qytetarë të shumtë nga mbarë vendi vizituan Kompleksin Memorial ‘Zahir Pajazitit’ në Orllan. Kulla e Heroit sot kishte hap dyert për të gjithë ata vullnetarë nga mbarë Kosova të cilën dhuruan gjak për të shënuar këtë ditë historike. Ky aktivitet organizohet për të pestën herë me radhë nën organizimin e OJQ ‘SDK’ dhe Iniciativës Qytetare Orllan”, ka theksuar Zeka.
Ai i ka falënderuar pjesëmarrësit në këtë aksion vullnetar të dhurimit të gjakut , që sipas tij, çdo vit është duke u rritur numri i tyre.
© KOHA. Të gjitha të drejtat janë të rezervuara.
