Arbëri

INPO ngre dyshime për dallavere në tender, Komuna e Podujevës i mohon akuzat

Përderisa iniciativa për progres INPO akuzoi Komunën e Podujevës për keqpërdorim të parasë publike duke e shpërblyer një operator ekonomik më të shtrenjtë, zyrtarët komunalë e kanë quajtur këtë trillim dhe se ata insistojnë se komisioni vlerësues ka vepruar drejt në tenderin për asfalt

Trillim i ka quajtur zëdhënësi i Komunës së Podujevës, Fatri Zhitia, akuzat e organizatës joqeveritare INPO rreth dallavereve në një tender për asfaltimin e disa rrugëve në këtë komunë. Iniciativa për progres INPO e ka akuzuar pushtetin komunal të Podujevës se ka keqpërdorur paranë publike kur ka lidhur kontratë me një operator ekonomik duke e shpërblyer me kontratë ofertuesin më të shtrenjtë. Por, zëdhënësi Zhitia ka thënë se operatori më i lirë është vlerësuar i papërgjegjshëm.

“Sa u përket akuzave nga organizata joqeveritare Iniciativa për Progres (INPO) në drejtim të Komunës së Podujevës për skemë të planifikuar për dhënie të kontratës ndaj një operatori të caktuar ekonomik është trillim. Pasi që komisioni vlerësues për dhënie të kontratës nga Komuna e Podujevës nuk ia ka ofruar kontratën operatorit me çmimin më të lirë për shkak se ai është treguar i papërgjegjshëm në përmbushjen e kushteve dhe kritereve për marrjen e kontratës”, ka thënë Fatri Zhitia.

Zëdhënësi i Komunës së Podujevës ka deklaruar se komisioni vlerësues ka vërtetuar se menaxheri i caktuar nga partneri i grupit të operatorëve ekonomikë “World Medium” ka kontratë të rregullt pune me këtë OE.

“Po ashtu, i njëjti menaxher në CV-në e ofruar ka deklaruar se nga viti 2008 është drejtor në një kompani private ‘NPN ALPING’. Andaj, sipas dokumentacionit të paraqitur, komisioni vlerësues ka konstatuar se menaxheri në fjalë nuk ka parakontratë me grupin e operatorëve ekonomikë në fjalë, por i njëjti ka kontratë të rregullt pune me orar prej 8 orë në ditë e 40 orë në javë. Prandaj kjo bie ndesh me rregullat e Prokurimit Publik dhe komisioni vlerësues nuk ia ka dhënë kontratën këtij operatori ekonomik, por ofertuesit të dytë më të lirë”, ka theksuar Zhitia.

Ndërkohë, INPO nëpërmjet një komunikate për media ka thënë se Komuna e Podujevës e kishte shpërblyer operatorin ekonomik më të shtrenjtë për rreth 5 mijë euro.

“Në kuadër të monitorimit sistematik të prokurimit publik, INPO është duke monitoruar aktivitetin e prokurimit me titull: ‘Asfaltimi i disa rrugëve në fshatrat Orllan-Brainë-Turuqicë-Herticë-Barainë’, me numër të prokurimit 615-22-4693-5-2-1 dhe vlerë të parashikuar 120,000 euro, të udhëhequr nga Komuna e Podujevës. Për këtë aktivitet të prokurimit kanë ofertuar gjithsej pesë (5) operatorë ekonomikë”, thuhej në komunikatën e INPO-s. “Sipas procesverbalit të hapjes së tenderëve grupi i operatorëve ekonomikë ‘Quality Asphalt & World Medium’, me vlerë të ofertës prej 101,730.96 eurosh ishte oferta më e lirë. Ndërkaq, fitues i kontratës është shpallur ‘Rahovica Comerce’, me vlerë të ofertës prej 106,478.30 eurosh, respektivisht rreth 5 mijë euro më shtrenjtë se oferta e parë më e lirë”.

Sipas INPO-s, ofertuesi më i lirë është eliminuar pa bazë ligjore.

“Gjetjet e INPO-s, tregojnë se komisioni për vlerësimin e tenderëve kishte konstatuar se ky grup i OE-ve “Quality Asphalt & World Medium” është i papërgjegjshëm pasi që nuk e plotëson kërkesën e dosjes së tenderit për kapacitet teknik dhe profesional, respektivisht nuk e plotëson kërkesën për ‘një (1) menaxher të projektit – inxhinier i diplomuar ose master i ndërtimtarisë’ pasi që, sipas këtij komisioni, ‘menaxheri i emëruar për këtë aktivitet është i punësuar edhe në një kompani tjetër me orar të plotë”, thuhet tutje në komunikatë. “INPO ka kërkuar qasje në ofertat e të dy (2) ofertuesve respektivë, dhe pas analizimit të tyre vlerëson se vendimi i komisionit ka qenë krejtësisht i pabazuar në ligj dhe i dëmshëm për institucionin e komunës. INPO ka gjetur se grupi i OE-ve ‘Quality Asphalt & World Medium’ me të gjithë menaxherët e propozuar sipas kërkesave të dosjes së tenderit ka lidhur parakontrata të vërtetuara me akt noterial. Andaj, arsyetimi i vendimit për eliminimin e grupit të OE-ve ‘Quality Asphalt & World Medium’ është i padrejtë dhe paragjykues, rrjedhimisht i kundërligjshëm”.

Tutje në komunikatën e INPO-s thuhet se Ligji për Prokurim Publik dhe Rregullat e Prokurimit nuk e obligojnë operatorin ekonomik që të ketë stafin apo pozitat profesionale të punësuar paraprakisht, por kërkon që OE t’i ofrojë dëshmi të mjaftueshme autoritetit kontraktues se të gjitha kërkesat për kapacitet teknik dhe profesional i përmbush dhe i ofron në shërbim sipas termave të kontratës.

“Rrjedhimisht, ky arsyetim sipas vlerësimeve të INPO-s, ka për qëllim manipulimin me procedura të prokurimit dhe favorizimin e OE-ve të caktuar. Tutje, sipas INPO-s, pronari i kompanisë ‘Quality Asphalt’ i cili ishte lider i Grupit të OE-ve i shpallur i papërgjegjshëm për kontratë dhe pronari i kompanisë ‘Rahovica Comerce’, e cila është shpërblyer me kontratë janë vëllezër. Rrjedhimisht, INPO me arsye dyshon se kjo është një skemë e planifikuar dhe e koordinuar në mes të OE-ve dhe Autoritetit Kontraktues”, thuhej në komunikatë. “Këtë e argumenton edhe fakti se kundër vendimit të Autoritetit Kontraktues, grupi i OE-ve ‘Quality Asphalt & World Medium’ nuk kishte parashtruar fare kërkesë për rishqyrtim apo ankesë në Organin Shqyrtues të Prokurimit. Andaj, INPO kërkon nga kryetari i Komunës së Podujevës marrjen e masave të menjëhershme administrative dhe disiplinore brenda përgjegjësive të tij ligjore kundrejt zyrtarit përgjegjës të Prokurimit dhe anëtarëve të komisionit për vlerësimin e tenderëve, si dhe të sigurohet se Komuna e Podujevës zbaton me përpikëri ligjin dhe rregullat e prokurimit dhe lufton skemat e manipulimeve që dëmtojnë konkurrencën e lirë dhe trajtimin e barabartë të OE-ve në procedura të prokurimit”.

Nëpërmjet kësaj komunikate INPO i ka ftuar organet zbatuese të ligjit që të ndërmarrin masat e nevojshme ligjore kundrejt, siç thuhej, keqpërdorimit të detyrës zyrtare, keqpërdorimit dhe mashtrimit në prokurimin publik.