Komuna e Gjilanit e kishte konsideruar të zgjidhur çështjen e varrezave, kur katër vjet më parë asaj i ishte bartur një hapësirë nën administrim të Agjencisë së Privatizimit. Por, vendimin e Qeverisë Kurti, kjo pronë dhe disa të tjera në shtatë komuna, i janë rikthyer AKP-së. Banorët në Gjilan shprehin shqetësimin për mungesë hapësire për varre të reja, e në Asociacionin e Komunave kanë thënë se në shumë qytete problemi është i njëjtë

Në varrezat e Gjilanit ka mbetur pak hapësirë e lirë për varre të reja. Banorët janë shprehur të shqetësuar që ende nuk është bërë zgjidhje e përhershme ku mund t’u bëhet nderimi i fundit të afërmve të tyre.

Hatixhe Demi, banore e Gjilanit, ka thënë se në varreza thuajse s’ka më vend.

“Mjaftueshëm vende jo që s’ka, por nuk di as ku po i gjejnë vendet që të bëjnë varrime”, ka thënë ajo, duke pritur që Komuna sa më shpejt të ndërmarrë diçka e të zgjidhet ky problem.

Qamil Qerimi, që po ashtu konfirmon mungesën e hapësirës, e përshkruan të mjerueshme gjendjen e varrezave.

“Edhe kjo ka qenë çështje qe katër-pesë vjet nëpër Komunë, dhe është zhagitë kjo punë”, ka thënë Qerimi.

Komuna e Gjilanit e kishte konsideruar të zgjidhur çështjen e varrezave, kur katër vjet më parë asaj i ishte bartur një hapësirë nën administrim të AKP-së, e që ndodhet në lagjen “Zabeli” afër fshatit Velekincë. Por, me një vendim të Qeverisë Kurti, kjo pronë dhe disa të tjera në shtatë komuna i janë rikthyer AKP-së. Qeveria në fakt ka shfuqizuar vendimin e Qeverisë Haradinaj me arsyetimin se ka qenë i jashtëligjshëm.

Megjithatë, këtë vendim të Qeverisë e përkrah Komuna e Gjilanit.

Drejtori për Kadastër, Gjeodezi dhe Pronë, Bekim Salihu, ka thënë se janë duke punuar në planin zhvillimor për të definuar saktë edhe çështjen e pronave të varrezave.

“Ne si Komunë dhe si Drejtori e Gjeodezisë, Kadastrës dhe Pronës, e përkrahim vendimin e Qeverisë për shkak se vendimi ka qenë praktikisht i pazbatueshëm, për shkak të mangësive ligjore dhe juridike që ka pasur. Edhe ashtu në Gjilan dhe në të gjitha komunat e tjera asnjëherë procedurat nuk janë dërguar deri në fund dhe pronat figurojnë dhe vazhdojnë të figurojnë ende sikur prona të cilat menaxhohen nga AKP-ja”, ka thënë Salihu. “Mendoj që Komuna ka dy ose tri opsione në lidhje me çështjen e varrezave. Kjo është procedurë që duhet të kalojë përmes Kuvendit Komunal dhe besoj që pas propozimit në rast se kalojnë në Kuvendin Komunal do të zgjidhet edhe problemi i varrezave”.

Përveç Gjilanit, mungesë të pronave komunale të destinuara për varreza, drejtori i Asociacionit të Komunave të Kosovës, Sazan Ibrahimi, ka thënë se të kenë edhe Komuna e Ferizajt dhe komunat e tjera.

“Në përgjithësi komunat janë ankuar në Asociacionin e Komunave të Kosovës edhe nëpër kolegjiumet tona profesionale që ka mungesë të jashtëzakonshme të pronave, të cilat mund të shfrytëzohen edhe për varreza. Për këtë arsye ka pasur kërkesa të komunave në mënyrë të drejtpërdrejtë drejtuar Qeverisë së Republikës së Kosovës që të jepen disa parcela në mënyrë që ato të shfrytëzohen për varreza”, ka thënë Ibrahimi.

Ministria e Administrimit të Pushtetit Lokal dhe AKP-ja nuk kanë dhënë informacione mbi pronat që komunat i kërkojnë me qëllimin që të bëjnë zgjidhje për varreza.

Krahas Ferizajt, pronat AKP-së do t’ia kthejnë edhe Komuna e Gjilanit, Suharekës, Skenderajt, Deçanit, Junikut dhe Hanit të Elezit.