Kryetari i sapo zgjedhur i Komunës së Prizrenit, Shaqir Totaj pas certifikimit të rezultatit të zgjedhjeve të raundit të dytë nga ana e KQZ-së ka vlerësuar se ka ardhur koha për të punuar për Prizrenin e të ardhmes si dhe përmirësimin e jetesës së qytetarëve.

Sipas tij me vendimin e fundit të KQZ-së është vërtetuar se zgjedhjet e 14 nëntorit në këtë komunë kanë qenë demokratike dhe kanë pasqyruar vullnetin e qytetarëve.

“Sot, edhe zyrtarisht, Komisioni Qendror i Zgjedhjeve më ka certifikuar si Kryetar të ri të Prizrenit. Me këtë hap, u konfirmua edhe një herë fitorja e Partisë Demokratike të Kosovës, se zgjedhjet e 14 nëntorit në komunën tonë ishin demokratike dhe zbatim i vullnetit të qytetarëve të Prizrenit. Falënderoj edhe një herë të gjithë qytetarët për një proces korrekt, për besimin e dhënë e mbi të gjitha që përqafuan ndryshimin, si akt mëse i nevojshëm për qytetin tonë. Tash është koha për punë e vizion për Prizrenin e të ardhmes dhe përmirësim të jetës së qytetarëve tanë, pa dallime. Ky është Prizreni për të cilin unë do të angazhohem e qyteti për të cilin ne kemi nevojë”, është shprehur Totaj në rrjetet sociale.

Komisioni Qendror i Zgjedhjeve (KQZ), mes polemikave ka certifikuar rezultatet përfundimtare të raundit të dytë të zgjedhjeve për kryetar të Prizrenit dhe Kllokotit.

Pretendimi i Lëvizjes Vetëvendosje se ka dorëzuar ankesë në Gjykatën Supreme për parregullsitë në Prizren e vuri në dyshim certifikimin e rezultateve në këtë komunë. Mirëpo, kryesuesi i KQZ-së dhe anëtarët e tjerë e mohuan një gjë të tillë dhe proceduan tutje.

Më herët gjatë ditës është raportuar se Gjykata Supreme e Kosovës i ka dhënë dritën jeshile Komisionit Qendror të Zgjedhjeve që të certifikojë Shaqir Totajn si kryetar të Prizrenit.

Në përgjigjen që Gjykata Supreme i ka kthyer KQZ-së, ka treguar se deri sot nuk kanë marrë asnjë ankesë në lidhje me këtë temë dhe se KQZ-ja është e lirë që të certifikojë Totajn si kryetar të ri.

“E gjithë kjo shtyrje ka ndodhur pasi që Lëvizja Vetëvendosje ishte ankuar në PZAP për parregullsi, ankesë e cila i ishte kthyer mbrapa kësaj partie nga ky organ. Por, Totaj nuk është certifikuar akoma nga KQZ për shkak të pritjes se mos një ankesë e tillë ka shkuar edhe në Gjykatën Supreme. Supremja ka treguar se një gjë e tillë nuk ka ndodhur dhe KQZ mund të vazhdojë me procedurat e saj”, thuhej në një njoftim që PDK-ja u ka dërguar mediave.