Arbëri

Një rrugë “e veçantë” në Lipjan e ndarë me mur

Partia Demokratike e Kosovës, dega në Lipjan, ka akuzuar komunën se po keqmenaxhon me paranë publike, derisa ka asfaltuar disa rrugë dhe rrugica në fshatin Sllovi e Gadime.

Sipas PDK-së, komuna ka asfaltuar madje edhe një rrugë të ndarë me mur të lartë në mes.

Nëpërmjet një komunikate të enjten, ky subjekt ka bërë me dije se në fshatin Sllovi dhe Gadime po diskriminohen banorët, derisa lagjet më të mëdha nuk kanë përfituar asfaltim të rrugëve.

“Ditëve të fundit jemi dëshmitarë se ekzekutivi i Lipjanit po i diskriminon banorët e Gadimes dhe Sllovisë. Ne si PDK kemi vizituar këto dy fshatra dhe kemi vërejtur se si është bërë shpërdorimi i buxhetit të qytetarëve. Në një lagje në fshatin Sllovi komuna ka asfaltuar dy rrugë paralele me një muri në mes mbi baza politike, kurse në shumë lagje tjera që nuk i përkasin partisë në pushtet nuk janë asfaltuar fare. Po ashtu gjatë ditëve të fundit ngjashëm ka vepruar edhe në fshatin Gadime, duke i diskriminuar qytetarët”, thuhet në komunikatën e PDK-së.

Ky subjekt ka kërkuar sqarime nga komuna nëse këto rrugë janë prona publike apo private, derisa janë asfaltuar me paratë e taksapaguesve.

“Si është e mundur, që një vartës i këtij kryetari në fshatin Sllovi të sillej si sundimtar, duke ofenduar të gjithë banorët e fshatit, duke asfaltuar rrugët vetëm për familjen dhe militantët e tij. Dyshimet janë se ky person të cilit do t’ia publikojmë identitetin në të ardhmen, vendos që edhe kopshti i premtuar para disa viteve të dërgohet afër shtëpisë së tij”, thuhet më tej në komunikatë.

Ndërkohë, rreth kësaj çështje, KOHA ka provuar të marrë një deklaratë nga drejtori për Shërbime Publike në Lipjan, Rasim Hasani, por ai nuk ka qenë i qasshëm.

Image