Një sërë shkeljesh ka konstatuar Zyra Kombëtare e Auditimit gjatë një auditimi bërë komunës së Gjilanit, i cili është bërë publik së fundi nga ZKA.
Vetëm në kategorinë e shërbimeve dhe mallrave auditori ka gjetur se nuk janë respektuar procedurat e pagesave në 17 raste.
Sipas këtij raporti nga 22 mostrat të testuara si pjesë e testimeve substanciale në kategorinë e Mallrave dhe Shërbimeve, kemi gjetur se në 17 prej tyre në shumë prej 631,405€ nuk janë respektuar hapat për procedimin e pagesave, ku fillimisht është sjellë malli/shërbimi dhe fatura e pastaj është bërë zotimi i mjeteve dhe ishte lëshuar urdhërblerja.
Në një kontratë tjetër të testuar nga auditori vlera e së cilës ishte mbi 570 mijë euro janë vërejtur shkelje .
“Për kontratën “Punë Publike - projekte të vogla në infrastrukturë” vlera e parashikuar e kontratës 570,000€ është vërejtur se kryetari i komisionit për vlerësimin e ofertave të tenderit ishte caktuar edhe Menaxher projekti për këtë kontratë” thotë auditimi.
Por sipas sqarimeve të zyrtarëve komunal, kjo ka ndodhur, pasi që ishte kohë pandemie dhe nuk kishte zyrtarë tjerë të cilët e pranonin këtë pozitë.
Në këtë kontratë auditori gjithashtu ka vërejtur se operatori ekonomik fitues nuk kishte ofruar dëshmi se e plotëson kërkesën e dosjes së tenderit (çekiç pneumatik).
“Sipas anëtarëve të komisionit të vlerësimit meqenëse Operatori Ekonomik ka ofruar një çekiç, e kanë konsideruar që mjafton për të plotësuar këtë kriter nga dosja e tenderit” thuhet në raportin e audimit.
Projekti ”Punë publike - projekte të vogla në infrastrukturë” vlera e parashikuar e kontratës 570,000€ dhe projekti "Rekonstruimi i rrugëve në Lagjen Dardania" në vlerë prej 137,744€, nuk kishte projekt ekzekutiv të ndërtimit ka vërejtur auditori.
Sipas zyrtarëve komunal, kjo ka ndodhur pasi njëri projekt është për shtrimin e rrugës e cila veç është ekzistuese, ndërsa projekti tjetër ka të bëjë me intervenime sipas nevojës në infrastrukturën publike. Inicimi i procedurës së prokurimit në mungesë të projektit rezulton me anashkalim të kërkesë ligjore dhe mundëson realizim të dobët të kontratave për punë të pa projektuara, studiuara dhe mund të rezultojë me shpenzime të paparashikuara nga komuna” tërheq vërejtjen ZKA.
Raporti gjithashtu ka gjetur se vlera prej 172,020 euro është paguar për shërbime të varrimit nga kategoria e mallrave dhe shërbimeve ndërsa sipas natyrës së shpenzimit i takojnë kategorisë së subvencioneve.
“Nga kategoria e investimeve kapitale janë bërë dy pagesa në vlerë 10,839€ për blerjen e mallrave dhe shërbimeve. Ato kanë të bëjnë me mirëmbajtjen e sinjalizimeve horizontale dhe vertikale në qytetin e Gjilanit dhe blerjen e materialeve shpenzuese për shkolla” thotë raporti.
Për kontratën kornizë “Mirëmbajtja teknike e objekteve në të gjitha njësitë kërkuese në Komunën e Gjilanit”, në vlerë prej 711,089€, Komuna për 12 pozicione ka tejkaluar sasinë totale të këtyre pozicioneve të kontratës kornizë.
“Në total për këto pozicione për tre vite maksimumi i pagesave do duhej të ishte 40,095€. Për këto pozicione kishte tejkalime edhe në vitin 2019, ndërsa në vitin 2020 për këto pozicioni ishin paguar edhe 125,371€. Kjo ka ndodhur si pasojë e mungesës së kontrollit të kushteve të përcaktuara me kontratë” është thënë në raport .
© KOHA. Të gjitha të drejtat janë të rezervuara.
