Arbëri

KFOR-i italian bën objektin e Komunës së Pejës me impiant solar

Të premten është inauguruar impianti me 32 tabela solare të vendosura në njërin prej kulmeve të objektit të administratës komunale të Pejës. Ky impiant solar për prodhimin e energjisë alternative ju dhurua Komunës së Pejës nga forcat paqeruajtëse të KFOR-it italian.

“Projekti ka rëndësi shumë të madhe. Ka kuptim të modernizmit dhe me ecë në hap me kohën, respektimin e ambientit dhe me vetë faktin se ky impiant solar është bërë në komunë, të jetë një shembull për qytetarët që të shtojnë shfrytëzimi i impianteve solare për energji alternative dhe ruajtjen e mjedisit”, u shpreh në këtë inaugurim nënkoloneli italian Antonio Bernardo, komandant i Batalionit Kinetik të forcave italiane në Kosovë.

Ushtaraku italian nuk e tregoi vlerën e projektit, për të cilin në emër të komunës ju falënderua drejtori i Financave, Jeton Abazaj.

“Falënderoj KFOR-in italian për këtë donacion shumë të rëndësishëm.

Me impiantin solar, komuna do të shfrytëzojë energjinë alternative dhe njëkohësisht do të kursejë edhe mjete për shpenzimin e energjisë elektrike nga rrjeti elektrik. Jemi ndër komunat e para që falë KFOR-it italian shfrytëzojmë një mundësi të tillë”, u shpreh Abazaj.

Sipas inxhinierit të kompanisë së kontraktuar nga KFOR-i për këtë projekt, Xhevat Muça, ky impiant solar prodhon deri në 10 kilovatë rrymë. Dhe, sipas tij, shpenzimi mbi këtë sasi të rrymës merret nga rrjeti i zakonshëm elektrik.

Muça sqaroi se rryma e prodhuar nga panelet solare, të cilat, sipas tij, janë të teknologjisë së fundit, janë burimi primar i energjisë elektrike për objektin e komunës.

Ndërsa, në hyrje të objektit të komunës është vendosur edhe një tabelë digjitale në të cilën mund të shihet sasia e rrymës që prodhohet në moment nga tabelat solare dhe sasia e rrymës që shpenzohet nga rrjeti elektrik.