Subjekti opozitar Partia Demokratike e Kosovës, dega në Lipjan nëpërmjet një konference, të martën, ka kritikuar qeverisjen lokale për mosmbikëqyrje të projekteve kapitale të cilat sipas tyre në terren po realizohen jashtë kritereve dhe paramasave të nënshkruara me kontratë.
Sipas këtij subjekti, qeverisja lokale po vazhdon me kurdisje të tenderëve me kompanitë e njohura nga Podujeva mbi baza politike e familjare.
Po ashtu PDK-ja ka bërë krahasimin e kontratave të ndryshme që janë duke u realizuar në komunën e Lipjanit, andaj në një rast ka gjetur se në kontratën për
“Mirëmbajtjen e infrastrukturës, rrugëve të asfaltuara dhe trotuareve në Komunën e Lipjanit“, sanimi i një grope prej 1m2 në Lipjan i kushton buxhetit të komunës deri 81.5 euro/m2. Ndërkaq, sipas PDK-së ato projekte nuk po mbikëqyren nga askush.
Rinor Retkoceri, kryetar i Rinisë, njëherësh anëtar i kryesisë së PDK-së në Lipjan, me këtë rast ka thënë opozita edhe në të kaluarën ka shprehur shqetësime se si po ekzistojnë lidhjet ndërmjet menaxherëve të kontratave me kompanitë fituese në këtë komunë.
“Pothuajse në shumicën e tenderëve të fituar nga kompanitë e njohura ka qenë i njëjti zyrtar si menaxher i kontratës, andaj ne dyshojmë se këtu bëhet fjalë për kurdisje të tenderëve, siç kemi raportuar edhe më herët sepse komuna e Lipjanit është e njohur për këto kurdisje sikurse është rasti me kompanitë nga Podujeva. Kjo, nguti e ekzekutivit të Lipjanit ne dyshojmë se ka dy qëllime: Pasurimi i jashtëligjshëm ekzekutivit përmes tenderëve me çmime astronomike si dhe për t’u arsyetuar shpenzimin e buxhetit pa mbulesë”, ka thënë Retkoceri.
Sipas tij, së fundi kanë hulumtuar dhe krahasuar kontrata të ndryshme që janë realizuar në terren, ndërkaq objekt i hulumtimit ka qenë kontrata për ndërtimin e shtigjeve të ecjes dhe biçikletave në Lipjan.
“Gjatë hulumtimit kemi evidentuar se fillimisht dyshohet për kurdisje të tenderit pasi që ofertuesit si kriter i është vendosur të ketë Traktor 4x4 gjë që dyshojmë se nuk nevojitet një makineri e tillë për këtë projekt. Pastaj ulëset e vendosura kanë dimensione më pak se 2 metra, kurse sipas kontratës ato është dashur të vendosen me dimensione prej 2.50 metra. Shportat për mbeturina nuk janë vendosur me material të “Inox”-it sipas kontratës, por ato janë të korroduara. Shkelje tjetër flagrante është mos vendosja e shtyllave 3 teleskopike për pjesët ku lejohet qasja e kufizuar e automjeteve ku një pajisje e tillë kushton 3500 deri 4000 euro”, ka thënë Retkoceri.
Sipas tij, para pak kohësh kanë publikuar edhe rastet e keqpërdorimeve të parasë publike, pastaj rastet e drejtorëve dhe inspektorëve me aktakuza të cilët nuk janë suspenduar nga puna sipas ligjeve në fuqi.
Po ashtu sipas tij, opozita ka publikuar edhe për rastet e diskriminimit dhe kurdisjes së konkurseve në sistemin arsimor por deri më tash askush nuk ka marrë masa për t’i hetuar ato.
“Kurdisja e tenderëve po vazhdon me kompaninë e njohur nga Podujeva, pastaj dhënia e tenderëve mbi baza familjare dhe keqmenaxhimi me projektin e hartave zonale duke diskriminuar bizneset të cilat nuk janë përkrahës të subjektit të LDK-së. Së fundi kemi reaguar edhe për arrestimin e anëtarit të kryesisë së LDK-se në Lipjan për keqpërdorim të detyrës zyrtare, keqpërdorim me subvencioneve, dhe marrje ryshfetit. Por ekzekutivi nuk e ka publikuar ndonjë vendim për suspendimin e tij nga puna”, ka thënë Retkoceri.
Sipas tij, keqpërdorimet e detyrës zyrtare nuk kanë të bëjnë vetëm nga inspektorët por ka edhe nga drejtorët e ekzekutivit.
“Kemi rastin e tejkalimit të lejeve ndërtimore në objekte banesore nga kuvendarët e LDK-së dhe drejtorët e ekzekutivit siç ishte rasti i drejtorit të inspektoratit i cili më 2 shkurt të vitit 2019 ka ndërtuar një biznes pa leje duke e shkelur ligjin për ndërtime Nr.04/L-110.
Në këtë proces ne dyshojmë se ka pasur edhe shkelje të tjera të konfliktit të interesit derisa nuk është përfillur procedura e lëshimit të lejes ndërtimore në bazë të ligjit Nr.04/L-110”, ka thënë Retkoceri.
Në anën tjetër drejtori për Shërbime Publike në Komunën e Lipjanit, Rasim Hasani, gjatë së martës nuk ka qenë i qasshëm për të marrë një deklaratë rreth shqetësimeve të opozitës.
© KOHA. Të gjitha të drejtat janë të rezervuara.
