Arbëri

Podujeva synon t’i mbrojë të drejtat e fëmijëve me rregullore

Komunarët e Podujevës po synojnë që nëpërmjet një rregulloreje t’i mbrojnë dhe avancojnë të drejtat e fëmijëve. Në këtë dokument, që është vënë në dëgjim publik, flitet edhe për sigurinë e fëmijëve, shëndetin, edukimin, zhvillimin e fëmijëve, etj.

“Me këtë rregullore përcaktohen rregullat dhe procedurat për përkujdesjen dhe mbrojtjen e fëmijës, në zbatim të Ligjit për mbrojtjen e fëmijës dhe kompetencave vetanake të Komunës së Podujevës, me qëllim të: mbrojtjes së fëmijës nga të gjitha format e dhunës fizike dhe mendore, abuzimit, keqpërdorimit, shfrytëzimit, neglizhimit apo ndonjë forma tjetër që vë në rrezik jetën, sigurinë, shëndetin, edukimin, arsimimin dhe zhvillimin e fëmijës”, thuhet në nenin 1 që flet për qëllimin të propozim-rregullores për përkujdesjen dhe mbrojtjen e fëmijës. “Përcaktimi i detyrave dhe përgjegjësive të subjekteve për mbrojtjen e fëmijës, si dhe mënyrës së koordinimit, raportimit dhe bashkëpunimit të tyre me qëllim të kontributit në sistemin për mbrojtjen e fëmijës, si dhe; kontributit në krijimin e një komunë mike për fëmijë”.

Siç thuhet tutje, ky dokument zbatohet për përkujdesjen dhe mbrojtjen e fëmijës në të gjitha fazat, për të gjitha masat, veprimet dhe vendimet që kanë të bëjnë me fëmijën, nga të gjitha subjektet për mbrojtjen e fëmijës në Komunën e Podujevës, në përputhje me obligimet e dala nga Ligji për mbrojtjen e fëmijës, me këtë Rregullore si dhe legjislacionin përkatës në fuqi, dhe po ashtu zbatohet për fëmijën me shtetësi kosovare, pa shtetësi, të paregjistruar, azilkërkues, refugjat ose me shtetësi të huaj, brenda territorit të Komunës së Podujevës.

“Dispozitat e kësaj Rregulloreje nuk mund të merren si kufizim apo pakësim i të drejtave ekzistuese të fëmijës të përcaktuara me Kushtetutën e Republikës së Kosovës, Ligjin për mbrojtjen e fëmijës, Konventën për të drejtat e fëmijës ose me instrumentet ndërkombëtare që rregullojnë këtë fushë, si dhe me legjislacionin tjetër në fuqi”, thuhet në këtë propozim-rregullore.

Sipas nenit 4, mbrojtja e jetës dhe të drejtave të fëmijës është detyrimi kryesor, në masën maksimale të mundshme, për çdo përfaqësues ligjor, person, subjekt për mbrojtjen e fëmijës, institucion apo organ tjetër në territorin e Komunës së Podujevës. në nenin pasues, thuhet se të gjitha veprimet dhe vendimet, në të gjitha fazat që kanë të bëjnë me fëmijën, të ndërmarra nga përfaqësuesit ligjor dhe subjektet për mbrojtjen e fëmijës të Komunës së Poduevës, duhet të jenë në përputhje me parimet dhe dispozitat e Ligjit që përfshin edhe interesin më të mirë të fëmijës.

“Për të siguruar interesim më të mirë të fëmijës, duhet respektohen parimet e përcaktuara në Ligj dhe asnjë interpretim i supozuar i asaj se çka është në interesin më të mirë të fëmijës nuk mund të justifikojë shkeljen e çfarëdo të drejte të njohur nga Kushtetuta, Konventa, Ligji për shërbime sociale dhe familjare, si dhe ligjet tjera përkatëse”, thuhet në të njëjtin nen. “Përfaqësuesit ligjorë dhe subjektet për mbrojtjen e fëmijës në të gjitha fazat dhe në të gjitha veprimet dhe vendimet që kanë të bëjnë me fëmijën, koordinojnë masat dhe veprimet e tyre për të siguruar interesin më të mirë të fëmijës”.

Rregullorja flet edhe për parimin e trajtimit të barabartë të fëmijës, për frymën e edukimit të fëmijës, përgjegjësinë prindërore dhe familjare për përkujdesjen e fëmijës, për ndihmën ndaj prindërve dhe familjeve për përkujdesjen e fëmijës, obligimet e komunës ndaj fëmijës, për detyrimin e raportimit për dhunën ndaj fëmijës, për mekanizmat për mbrojtjen e fëmijës, rolin e Qendrës për Punë Sociale, për rolin e personave fizikë dhe juridikë në ofrimin e shërbimeve për mbrojtjen e fëmijës, etj.

Rregullorja është e ndarë në shtatë kapituj dhe pos kapitullit të parë që flet për dispozitat e përgjithshme, kjo Rregullore flet edhe Parimet e përkujdesjes dhe mbrojtjes së fëmijës; Përkujdesja dhe mbrojtja e fëmijës; Mekanizmat komunal për mbrojtje të fëmijës; Bashkëpunimi për mbrojtjen e fëmijës; Promovimi i të drejtave të fëmijës dhe Dispozitat kalimtare dhe përfundimtare.