Për herë të parë që nga viti 2009, banorët e fshatit Bradash nuk kanë mundur ta votojnë bashkëvendësin e tyre, në këto zgjedhje të jashtëzakonshme për kryetar të Podujevës.
Agim Veliu, i cili vjen nga ky fshat, dha dorëheqje nga posti i të parit të Podujevës për të marrë udhëheqjen e Ministrisë së Brendshme, raporton KOHA.
Por për një bashkëvendës të tij, mungesa e emrit të Veliut në listën e kandidatëve, pas kaq shumë vjetësh është mrekulli, siç tha ai.
Derisa në qendrën e votimit të këtij fshati thonë se gjithçka ka shkuar në rregull e pa incidente.
“Asnjë vërejtje s’ka pasur, mirë ka shkuar situata. Këtu asnjëherë nuk ka pasur vërejtje”, ka deklaruar Fadil Zymeri, drejtor i shkollës “Nuhi Gashi” në këtë fshat.
Pa ndonjë telash, por me vështirësi për respektim të masave anti-COVID, ka shkuar procesi i zgjedhjeve në fshatin Llugë të Podujevës. As në këtë fshat pandemia nuk ka ndikuar që qytetarët të mos dalin për të votuar.
Sipas menaxherëve të këtyre qendrave, procesi i votimit ka filluar me kohë dhe se me kohë ishin pajisur edhe me materialin e nevojshëm për mbrojtje nga pandemia.
© KOHA. Të gjitha të drejtat janë të rezervuara.
