Kosovë

Rrezikohen grantet për komunat pas vendimit të Rakiqit për tërheqjen nga marrëveshja

Komuna e Pejës para tri javësh është njoftuar nga Ministria e Pushtetit Lokal se është njëra prej 17 komunave përfituese të grantit për performancën e treguar gjatë vitit 2019.

Për këtë, Peja, sipas drejtorit të Financave në këtë komunë, Jeton Abazaj, pritej të përfitonte shumën prej 798 mijë eurosh nga granti që në total kap vlerën prej 5.2 milionë euro, raporton KOHA.

Vlerë deri diku të ngjashme, pak mbi 750 mijë euro, ishte edhe ajo e paralajmëruar për Komunën e Gjilanit nga granti i njëjtë.

Mirëpo, këtë grant Komuna e Pejës dhe e Gjilanit, si dhe komunat e tjera përfituese, sipas Abazajt, që njëherësh kryeson Kolegjiumin e drejtorëve të Financave në Asociacionin e Komunave, rrezikojnë ta humbin.

Kjo pasi ministri i Pushtetit Lokal, Goran Rakiq, ka shkëputur njëanshëm marrëveshjen tripalëshe mes kësaj ministrie, komunave dhe donatorëve në këtë projekt.