Sipas Zeqirit, spitali i ri zgjidh problemin e Ferizajt

Drejtori i Spitalit Rajonal në Ferizaj, Jeton Zeqiri, në Interaktiv të KTV-së ka thënë se me spitalin e ri do të zgjidhen problemet e shumta që po përballen aktualisht në qytetin e Ferizajt.

“Ferizaj është në pritje të ndërtimit të spitalit të ri me një kapacitet prej 24 mijë metrave katrorë dhe tashmë jemi në një spital me një hapësirë rreth 3400 metrave katrorë dhe ky spital nuk i plotëson kushtet në bazë të parametrave të cilët kërkohen në botën tonë mjekësore”, ka thënë Zeqiri.

Ai pret që shumë shpejt të vendosen në objektin e ri.

“U bëj apel qytetarëve që në këto kushte të kenë njëlloj durimi për arsye se shumë shpejt, me ndërtimin e spitalit të ri, do të dalim në objekt të ri dhe në këtë mënyrë do të zgjidhet ky problem i kamotshëm i qytetit tonë, duke e ditur që Ferizaj është qyteti i dytë, pas Prishtinës, për nga tatim paguesit ndërsa ne ende nuk e kemi një spital të mirëfilltë”, ka thënë Zeqiri.

Jeton Zeqiri, drejtor i Spitalit Rajonal në Ferizaj, në Interaktiv të KTV-së ka thënë se tre laboratorë në Ferizaj janë licencuar për testimet serologjike, derisa ka theksuar se një është në pritje të aparaturës për testime PCR.

Ai ka bërë të ditur se në Spitalin e Përgjithshëm të Ferizajt janë të hospitalizuar 56 pacientë, dhe prej tyre 4 pacientë janë në ventilim mekanik, ndërsa 43 pacientë kanë nevojë për mbështetje për oksigjenoterapi dhe terapi protokollare të cilën thotë se janë duke e zbatuar me përpikëri për trajtimin e COVID-19.

“Nga këta pacientë vlen të theksohet se gjashtë pacientë janë në një fazë më kritike. Ndërsa pjesa tjetër e pacientëve qëndrojnë me shëndet mesatarisht të mirë dhe presim që shumë shpejt të lirohen nga spitali dhe të gëzojnë shëndet të mirë”, ka thënë Zeqiri. “Në bazë të informacioneve që unë i kam, sa i përket aspektit privat, në qytetin e Ferizajt kanë fituar licencën tri laboratorë për teste serologjike. Ndërsa është edhe një laborator në pritje të ardhjes së aparaturës PCR në mënyrë që të licencohet edhe për testime me PCR. Ndërsa sa i përket testimit të tashëm është e drejtë ekskluzive e Institutit Epidemiologjik”.

Ai thotë se çdo ditë bëjnë testime të pacientëve që hospitalizohen.

“Ne si spital vetëm i informojmë për pacientët tanë të cilët janë të hospitalizuar dhe në këtë mënyrë ata çdo ditë i janë përgjigjur thirrjes tonë dhe çdo ditë kemi testime të pacientëve tanë të cilët janë të hospitalizuar”, ka thënë ai.

© KOHA. Të gjitha të drejtat janë të rezervuara.