Një shpërthim i fuqishëm ka përfshirë mbrëmjen e se martës lagjen Kuvc të Gjilanit.
Dy granata dore u hodhën në oborrin e shtëpisë së Jeton Arifit, një natë më parë, raporton KTV.
Ndonëse nuk pati të lënduar nga ky shpërthim, një veturë u shkatërrua derisa u dëmtua tarraca e shtëpisë.
Arifi e akuzon ish-komandantin e tij në UÇPMB, Shefket Musliu, për këtë sulm.
E gjithë kjo, sipas Arifit, vjen pas një konflikti që të dy e kishin pasur vite më parë.
Si shkak i këtij shpërthimi, copa të këtyre granateve kanë rënë edhe në oborret e fqinjëve përreth. Derisa fqinjët të tronditur nga ky shpërthim nuk kanë dashur të flasin.
Por, për Policinë, ende mbesin të panjohur personat të cilët i hodhën këto granata, derisa thonë se për shkak të ndjeshmërisë së rastit, nuk mund të japin më shumë informata.
KTV-ja ka qëndruar edhe në shtëpinë e ish-komandantit të UÇPMB-së, Shefket Musliu, por djali i tij ka thënë se babai nuk gjendet në shtëpi.
Ndonëse nuk ka pranuar të flasë para kamerës, ai ka mohuar që babai i tij të jetë i përfshirë në këtë akt.
Prokuroria Themelore në Gjilan ka konfirmuar se ka nisur hetimet për këtë shpërthim, të cilin e ka cilësuar si “Shkaktim i rrezikut të përgjithshëm”.
Derisa ka thënë se po punon intensivisht në gjetjen e kryerësve të këtij akti.
-
Nga: Donika Voca Gashi
-
6 nëntor 2019 20:21
-
Shpërndaje në: