Qendra Kryesore e Mjekësisë Familjare në Obiliq ka pranuar një donacion nga Suedia me vlerë rreth 150,000.00€ nga donatori Xhafer Balaj, donacion ky i cili ka pajisur QKMF-në me pajisje mjekësore shumë të domosdoshme e në veçanti për Klinikën Intenzive dhe Klinikën e Radiologjisë.

Kryetari i Komunës, Xhafer Gashi, gjatë vizitës së sotme në QKMF, ka falënderuar për angazhimin drejtorin e saj, Haki Jasharin e në veçanti donatorin Xhafer Balaj, nga ku theksoi se shëndetësia vazhdon të mbetet prioriteti kyç i qeverisjes së tij.

Kjo pasi që, siç tha kryetari Gashi, “sektori i shëndetësisë është pjesa më e ndjeshme dhe pjesa e cila atakohet drejtpërdrejtë me jetën e qytetarit”.

“Andaj, ne në vazhdimësi po punojmë në krijimin e kushteve sa më mira të punës për profesionistët tanë shëndetësorë por edhe në ofrimin e shërbimeve sa më efikase për qytetarët tanë”, tha kryetari i Komunës së Obiliqit, Xhafer Gashi.

Komuna e Obiliqit në kuadër të këtij donacioni ka ndarë shumën prej rreth 35,000.00€ për pajisje mjekësore në QKMF.