Në Prizren s’po respektohet Ligji për Zhurmën, banorët e Qendrës Historike vazhdojnë të ankohen

Mehmet Krasniqi Mehmet Krasniqi 24 August 2019 21:15

Ka disa vjet që banorët e Qendrës Historike të Prizrenit janë në hall me zhurmën që krijohet nga kafiteritë e kësaj zone.

Të shqetësuar nga kjo gjendje, ata ankohen se niveli i zhurmës është rritur së fundmi, sidomos në orët pas mesnatës.

Në Këshillin për Trashëgimi Kulturore thonë se kafiteritë lëshojnë muzikë me zë shumë më të lartë sesa e lejon ligji, raporton KTV.

Organizatat kulturore të kësaj komune kanë kërkuar që të merren masa urgjente për ndalimin e zhurmës dhe shkarkimin e trafikut në Qendrën Historike.

Kryetari i Prizrenit, Mytaher Haskuka, thotë se inspektorati komunal vazhdimisht shqipton gjoba ndaj këtyre bizneseve.

Prizreni ende nuk ka rregullore e cila do të përcaktonte orarin e punës së bizneseve dhe të drejtat e tyre.

Miratimi i saj ka mbetur peng i mosmarrëveshjeve ndërmjet komunës dhe bizneseve, pasi këto të fundit nuk po pajtohen me kufizimet që janë planifikuar të vendosen ndaj tyre.

Haskuka kritikon Policinë se nuk po e mbështet sa duhet inspektoratin në aksionet kundër zhurmës së tepërt.

E, për të rritur shpejtësinë e reagimit ndaj bizneseve që shkelin ligjin, në Qendrën Historike, komuna ka ndarë një zyrë për Policinë, e cila sipas Haskukës do të funksionalizohet së shpejti.

© KOHA. Të gjitha të drejtat janë të rezervuara.

Komentet

Shto koment

Të ngjashme