Fillon ndërtimi i ujësjellësit për fshatin Orllan Foto: Koha

Fillon ndërtimi i ujësjellësit për fshatin Orllan

07 August 2019 13:39

Banorët e fshatit Orllan dhe fshatrave përreth do të bëhen me ujë të pijes. Ky projekt që financohet nga Ministria e Mjedisit dhe Planifikimit Hapësinor dhe Komuna e Podujevës ka filluar të ndërtohet të mërkurën.

Në këtë ceremoni kanë qenë të pranishëm ministri në ikje i MMPH-së, Fatmir Matoshi, kryetari i Komunës së Podujevës, Agim Veliu, zyrtarë tjerë e banorë të shumtë. Ndërtimi i ujësjellësit në fshatin Orllan ka filluar, raporton “Koha Ditore”.

Matoshi ka thënë se sot po e fitojnë edhe një betejë për ujin e pijes. Ai e ka quajtur të padrejtë rasti e banorëve të këtij fshati që kanë jetuar përskaj ujë, ndërsa kanë qenë të privuar nga ai.

“Ministria e Mjedisit dhe Planifikimit Hapësinor është e lumtur dhe e kënaqur që ka arit me e mbështet këtë projekt me rreth 1 milion euro, duke i falënderuar edhe partnerët tanë Komunën e Podujevës, Kompaninë Regjionale të Ujësjellësit ‘Prishtina’, Qeverinë e Kosovës, koordinatorin Besnik Tahirin, dhe duke i falënderua edhe banorët e Orllanit që e kanë pas durimin deri në ditën e fillimit të këtij projekti”, ka thënë ndër të tjera Matoshi.

  • Foto: Koha
  • Foto: Koha

Për realizimin e këtij projekti Komuna e Podujevës për sivjet ka paraparë 120 mijë euro.

“Ky është një projekt i përbashkët i Komunës, Ministrisë edhe Kompanisë ujësjellësi. Komuna e ka hartua projektin dhe për këtë vit ka ndarë edhe 120 mijë euro. Për vitin e ardhshëm planifikojmë të ndajmë një shumë në bazë të nevojës që kërkohet”, ka theksuar Veliu.

Ndërkohë, Rexhep Zeka që ka folur në emër të banorëve të fshatit Orllan ka thënë se sot është një ditë e veçantë për ta. Sipas tij, angazhimi i banorëve ka bërë që të fillojë së implementuari ky projekt.

© KOHA. Të gjitha të drejtat janë të rezervuara.

Komentet

Shto koment

Të ngjashme