Rikonfirmohet shkalla tatimore e njëjtë për ndërtesat e paluajtshme

Rikonfirmohet shkalla tatimore e njëjtë për ndërtesat e paluajtshme

Fisnik Minci 10 January 2019 10:31

Anëtarët e Kuvendit të Komunës së Prizrenit kanë miratuar vendimin për rikonfirmimin e bazës dhe normës tatimore për ndërtesat e paluajtshme, ashtu siç janë të përcaktuara me dispozitat e Rregullores Komunale për tatimin në pronë të vitit 2015.

Sipas përfaqësuesve të Drejtorisë së Financave, kjo nënkupton se dispozitat e njëjta për tatimin në pronë, përkatësisht për objektet e paluajtshme do të zbatohen edhe në vitin fiskal 2019. Ndërkaq për tatimin në tokë është thënë se do të zbatohen normat më të ulëta që i parasheh ligji i ri i tatimit në pronë, shkruan sot Koha Ditore.

“Me këtë vendim rikonfirmohen baza tatimore dhe norma tatimore në pronën e paluajtshme të përcaktuara në nenin 1 dhe 4 të Rregullores së Kuvendit të Komunës nr.01/011-219796, të datës 24 dhjetor 2015, të cilat do të zbatohen edhe në vitin fiskal 2019. Pra, ndryshime nuk do të ketë sa u përket objekteve të paluajtshme, meqë normat tatimore do të jenë të njëjta. Ndërsa te tatimi në tokë, norma tatimore do të jetë më e ulëta që lejohet me ligj”, ka shpjeguar Islam Osmankaj nga Drejtoria e Financave para këshilltarëve të KK-së së Prizrenit.

Por këshilltari i PDK-së, Shukri Quni, ka kërkuar që shkalla tatimore të lehtësohet për mërgimtarët, duke marrë parasysh faktin se ata pronat rezidenciale i shfrytëzojnë vetëm gjatë kohës së pushimeve.

Ndërkohë grupet e këshilltarëve të subjekteve të ndryshme kanë konfirmuar përkrahjen për miratimin e këtij propozim-vendimi.

(Gjerësisht, sot në "Kohën Ditore")

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.

Komentet

Shto koment

Të ngjashme