Deputeti i Grupit Parlamentar të Vetëvendosjes, nga lista Guxo, Haxhi Avdyli, ka thënë se në politikë i ndjek dy modele, atë të ish-presidentit Ibrahim Rugova dhe atë të presidentes aktuale Vjosa Osmani.

Në emisionin “Sonte me Rronin” në KTV, ai ka thënë se Rugova e ka pasur konceptin e politikave të mëdha, të ndërtimit të raporteve me ndërkombëtarët e orientim perëndimor.

“Zbrazëtinë e Vjosa Osmani s’mund ta mbushim (në partinë Guxo), por konceptet dhe idetë e saj janë brenda nesh, guximi, vendosmëria e mbajtja e fjalës do të jenë edhe te ne. Në politikë duhet ta kesh një model, për mua i pari është Rugova, i dyti Vjosa Osmani. Në këto koncepte e shoh cila është rruga e duhur në politikë. Ibrahim Rugova për disa koncepte dhe Vjosa Osmani për virtytet që i ka. Konceptet e mëdha politike që i ka edhe Vjosa tani, janë të presidentit Rugova. Për shembull raportet me ndërkombëtarët, marrëdhëniet me aleatët si SHBA-ja, orientimi perëndimor janë koncepte të ngritura nga Rugova dhe e gjithë skena politike po bazohet në to. Ndër virtytet më kryesore të Osmanit është se është e pakompromis në kuptimin e parimeve, mbajtjes së fjalës, luftimin e korrupsionit, nga kapja e grupeve të interesit dhe nga parapolitika. E ka identitetin e vet dhe e ka aftësinë e prezantimit të Kosovës në mënyrën më të mirë të mundshme para aleatëve të Perëndimit”, ka thënë ai duke shtuar se “Kosova është në duar të sigurta me presidenten Osmani”.