Në këtë tekst do të mund t’i lexoni zhvillimet kryesore të ditës së tretë të fushatës zgjedhore për balotazhin e zgjedhjeve lokale që do të mbahet më 9 nëntor. 18 komuna janë në balotazh.
Agjenda e Lëvizjes VETËVENDOSJE:
17:00 – Tubim në Pejë. (Hotel Dukagjini)
19:00 – Tubim në Gjakovë. (Pallati i Kulturës “Asim Vokshi”)
Agjenda e Partisë Demokratike të Kosovës:
1. Partia Demokratike e Kosovës mban tubim zgjedhor me qytetarët e Hasit të Prizrenit.
Vendi: Shtëpia e kulturës “Reshat Qoqaj”
Ora: 18:00
2. Partia Demokratike e Kosovës mban tubim zgjedhor me qytetarët e Prizrenit.
Vendi: Shkolla Fillore “Zenel Hajdini”, Piranë
Ora: 19:00
Agjenda e Lidhjes Demokratike të Kosovës:
18:30 - Lidhja Demokratike e Kosovës (LDK) mbanë aktivet zgjedhor në shkollën “Xhemajl Mustafa” në Dardani. (Shkolla “Xhemajl Mustafa”, Prishtinë)
Hyseni: Kemi në plan shumë aktivitete dhe nisma të reja për mërgatën
Kryetari i Gjilanit dhe kandidati edhe për një tjetër mandat në krye të komunës, Alban Hyseni ka thënë se do të vazhdojë t’i ketë prioritet bashkatdhetarët.
“Komuna e Gjilanit, do të vazhdoi të ketë prioritet bashkatdhetarët, të cilët vlerësohen si pjesë vitale, pasuri e kombit dhe potenciali për zhvillim të vendit. Duke parë se kontributi i diasporës ndihet dhe vlerësohet në çdo kohë dhe në secilin sektor, komuna do të rris aktivitetet dhe përkrahjen”, ka shkruar ai.
Hyseni, tha se mërgata është pjesë e rëndësishme e shoqërisë së Gjilanit.
“Zotohemi se do ta vazhdojmë mbështetjen dhe do ta forcojmë lidhjen me mërgatën tonë. Do të krijojmë Zyrën e Mërgatës, për t’i shërbyer më mirë dhe për të qenë më afër çdo qytetari tonë jashtë vendit”, tha ai.
Tutje theksoi se do të vazhdojnë me Forumin Ekonomik të Mërgatës, për të sjellë investime të reja dhe zhvillim ekonomik në Gjilan.
“Kemi në plan shumë aktivitete dhe nisma të reja për mërgatën tonë”, tha Hyseni.
Prebreza nga Bardhi i Madh: Fushë-Kosova po bashkohet për ndryshim
Kandidati për kryetar të Komunës së Fushë Kosovës nga Lëvizja Vetëvendosje, Valon Prebreza, ka mbajtur një takim elektoral në Bardh të Madh, një vend që për të ka rëndësi të veçantë si pikënisje e rrugëtimit të tij personal dhe politik.
Në fjalën e tij, Prebreza theksoi se Bardhi i Madh përfaqëson simbolikën e përkushtimit, punës dhe ndershmërisë: vlera që ai synon t’i reflektojë në udhëheqjen e ardhshme të komunës. Ai theksoi se mesazhi i qytetarëve në raundin e parë të zgjedhjeve ishte i qartë “Fushë Kosova kërkon ndryshim, transparencë dhe një komunë që i shërben qytetarit”.
Duke iu referuar rrugëtimit të deritanishëm të fushatës, Prebreza potencoi rëndësinë e bashkimit qytetar dhe të besimit të ndërsjellë si themel për zhvillimin e komunës. Ai shprehu përkushtimin për të ndërtuar një qeverisje që nuk bazohet në privilegje, por në përgjegjësi, dhe që synon të krijojë kushte më të mira për familjet, të rinjtë dhe të moshuarit e komunës.
Çeku premton dy çerdhe të reja për secilën lagje të Prishtinës
Kandidati i Lëvizjes Vetëvendosje për Prishtinën, Hajrullah Çeku, ka premtuar ndërtimin e dy çerdheve të reja në secilën lagje të kryeqytetit nëse e fiton balotazhin më 9 nëntor.
Çeku në balotazh do të përballet me Përparim Ramën e LDK-së, që është kryetar aktual i kryeqytetit.
Në raundin e parë më 12 tetor Rama doli i pari me 35 mijë e 595 vota, ndërsa Çeku ishte i dyti me 35 mijë e 77 vota.
"Numri 105 është numri për çerdhe të reja. Dy çerdhe të reja për secilën lagje të Prishtinës", ka shkruar Çeku në Facebook.
Të martën Çeku mbajti tubim në “Kodrën e Trimave” në Prishtinë.
“Në Kodrën e Trimave nuk ka munguar asnjëherë vullneti i banorëve; ka munguar drejtësia urbane, planifikimi komunal që respekton pronën, njeriun dhe dinjitetin, investimet kapitale të merituara për një lagje që ka kontribuar shumë më shumë sesa që ka marrë. Me Hajrulla Çekun kryetar, Kodra e Trimave do të jetë krenari për të kaluarën dhe model për të ardhmen sepse do të sigurojmë: Transformim të tërësishëm të lagjes përmes ndërtimit të lartë; Çerdhe të reja publike; Zgjidhje të plotë, të drejtë dhe transparente të çështjes së pronave; Zgjidhje përfundimtare për furnizimin e pandërprerë me ujë të pijes; Rrugë të sigurta me ndriçim publik, trotuare të reja, kufizim shpejtësie dhe kalime për këmbësorë; Parqe, kënde lojërash dhe hapësira gjelbëruese; Menaxhimi efikas i mbeturinave dhe mirëmbajtje e pastërtisë; Rehabilitim të sistemit të kanalizimit fekal dhe atmosferik”, ka shkruar kryeministri në detyrë Albin Kurti, njëherit kryetar i Vetëvendosjes.