Veselaj-Gutaj: Arsimi, prioritet kombëtar i PDK-së
Kandidatja e Partisë Demokratike të Kosovës për deputete, Luljeta Veselaj- Gutaj, ka thënë se partia e saj e ka prioritet kombëtar fushën e arsimit.
Derisa ka folur për këtë fushë në emisionin “Zgjedhjet në KOHË”, Veselaj-Gutaj ka thënë se për fushën e arsimit duhet të ketë buxhet të mjaftueshëm, i cili do t’u shpërndahet komunave në mënyrë që të arrihet një arsim sa më cilësor. Sipas saj, kjo duhet të fillojë që nga edukimi i hershëm e i cili duhet të inspektohet.
“Për të funksionuar dhe për të qenë cilësor edukimi i hershëm, qoftë në çerdhet publike edhe në ato private, duhet të ketë një inspektim të vazhdueshëm të Inspektoratit. Kapacitetet e burimeve njerëzore në Inspektoratin e Arsimit janë tepër të mangëta. PDK-ja do të rrisë kapacitetet edhe në numër, por edhe në cilësi, në ngritje profesionale të Inspektoratit të Arsimit”, ka thënë Veselaj Gutaj.
Kandidatja e PDK-së po ashtu ka prezantuar edhe planin e partisë për mësimin gjithëditor, për të cilin ka thënë se duhet të krijohet një kurrikulë dhe një linjë e veçantë buxhetore.
“Duhet ta kemi parasysh që mësimi gjithëditor ka një kosto goxha të mirë, dhe kjo gjithsesi duhet të ketë një linjë të veçantë, të jetë e planifikuar në buxhetin e Republikës së Kosovës... Derisa nuk kemi një kurrikulë të veçantë nuk mund të flasim për shifra, por është një kosto e lartë, sepse nëse nxënësit rrinë gjatë gjithë ditës aty duhet të përfshihen edhe ushqimi, aktivitetet jashtëkurrikulare, shëtitjet, etj.”, ka thënë ajo.
Tutje Veselaj-Gutaj ka thënë se duhet të jetë një departament i veçantë brenda Ministrisë së Arsimit që do të merret me këtë çështje.
Për Partinë Demokratike të Kosovës, prioritet, sipas saj do të jetë edhe digjitalizimi i procesit të arsimit, duke përfshirë krijimin e një platforme shtetërore të arsimit, në të cilën do të vendosen të gjitha të dhënat, dhe mësimdhënësit e nxënësit do të kenë mundësi që të bëjnë analiza të ndryshme.
Fejza e VV-së: Do të ndajmë kuponë që familjet në nevojë t’i dërgojnë fëmijët në çerdhe
Ndarja e kuponëve për edukimin e hershëm është risia që Lëvizja Vetëvendosje e ka paraparë në planin për arsimin me të cilin po garon në zgjedhjet e 28 dhjetorit.
Një gjë të tillë e ka thënë kandidatja për deputete nga radhët e kësaj partie, Arjeta Fejza, në emisionin “Zgjedhjet në KOHË”, në të cilin u diskutua për arsimin. Fejza ka thënë se përmes ndarjes së këtyre kuponëve, familjeve me asistencë sociale do t’u mundësohet që fëmijët t’i dërgojnë në çerdhe.
“Një risi do të jenë kuponët me të cilët do të mbështeten familjet në nevojë, ku familjet që do të kenë fëmijë që do të përfshihen në edukimin e hershëm do t’u mbulohen shpenzimet me anë të kuponëve nga ana e Ministrisë së Arsimit”, ka thënë ajo.
Kandidatja e LVV-së tutje ka shtuar se këta kuponë do të mund të shfrytëzohen edhe për çerdhe private.
E përveç planeve për zhvillimin në edukimin e hershëm, Fejza ka thënë se partia e saj ka parasysh edhe zhvillimin e mëtutjeshëm të arsimit parauniversitar, ku kanë paraparë ndërtimin e 5 gjimnazeve të specializuara.
“Ne parashohim që në qeverisjen e ardhshme të themelojmë 5 gjimnaze të specializuara të cilat do të jenë regjionale dhe mendojmë që përmes këtyre gjimnazeve të investohet në nxënës të cilët do të jenë jashtëzakonisht të përgatitur për universitet... Drejtimet e këtyre gjimnazeve do të jenë varësisht prej nevojave në terren”, ka bërë të ditur Fejza.
Fejza ka shtuar se nëse partia e saj rikthehet në pushtet, ajo do të vazhdojë mbështetjen për studentët dhe mësimdhënësit.