Kurti në Suharekë kërkon fitore më të thellë sesa më 9 shkurt për “t’i vazhduar projektet”

Ditën e dytë të fushatës për zgjedhjet e parakohshme parlamentare të 28 dhjetorit, Lëvizja Vetëvendosje (LVV) e ka përqendruar të enjten në tubimin e mbajtur në Shtëpinë e Kulturës “Ukë Bytyçi” në Suharekë .

Aty kryetari i kësaj partie, njëherësh kandidat për edhe një mandat si kryeministër, Albin Kurti, u ka kërkuar mbështetje qytetarëve të Suharekës për një triumf, i cili në shpejtësi e mundëson konstituimin e legjislaturës së re si dhe formimin e qeverisë. 

“Atëherë, kur qytetarët e Republikës, banorët e Therandës do t’u drejtohen kutive të votimit në mënyrë që 29 dhjetori t’ia kalojë 9 shkurtit, ashtu që të vazhdojmë mbarë e mirë për projektet për Suharekën e mbarë shtetin. Gjatë periudhës katërvjeçare kemi dëshmuar se qeverisem për siguri dhe begati. Këto duhet t’i rrisim dhe t’i ruajmë, t’i mirëmbajmë dhe t’i shpijmë edhe më tej”, ka theksuar Kurti.

Kryetari i LVV-së ka theksuar në Therandë se gjatë mandatit të tij si kryeministër janë asgjësuar strukturat kriminale në veri dhe në jug të Kosovës. 

“Siguria është kushti i begatisë. Kur themi siguri, e kemi parasysh rendin e ligjin që e kemi vendosur cep më cep dhe tash që po flasim askund, as në veriun, nuk ka struktura kriminale apo ilegale që mund t’i bëjnë ballë drejtësisë së shtetit të pavarur të Kosovës”, ka shtuar Kurti.  

Kandidati për kryeministër i Lëvizjes Vetëvendosje i ka akuzuar gjithashtu rivalët nga partitë e tjera për postin e udhëheqësit të Qeverisë se gjatë fushatës po japin premtime ekonomike të cilat, sipas tij, janë pa asnjë mbulesë.

Kurti ka theksuar se kundërkandidatët e tij janë duke bërë premtime “të rrejshme” për rritje të pagave për 50 për qind, pasi që ata “e dinë se nuk do të testohen në ulësen e kryeministrit”.

“Ky është paradoksi i premtimeve të rrejshme. Premtimi i rrejshëm thuhet pa asnjë përgjegjësi, pasi nuk do të vijë puna të testohen kurrë. Kur dëgjoni dikë duke thënë se do t’i zvogëlojmë tatimet dhe do t’i rrisim shpenzimet, veç mendoni se kush i ka dhënë mësim ekonomi këtij personi, ose ka ikë prej orës, nuk bën të përjashtohet. Pra, zvogëlo tatimet dhe rrite shpenzimet”, është shprehur Kurti në Therandë. 

Në kuadër të ditës së dytë të fushatës zgjedhore, kandidati për kryeministër i LVV-së ka bërë vizitë të enjten edhe te organizata “Handikos”. Nëpërmjet një postimi në rrjetin social Facebook, Kurti ka bërë të ditur se me këtë rast ka zhvilluar bisedime lidhur me mënyrat për përmirësimin e jetës dhe të kushteve për personat me nevoja të veçanta.

Kurti ka shkruar po ashtu se gjatë mandatit të tij si kryeministër në shkollat e Kosovës janë punësuar 422 asistentë si dhe janë investuar 6.4 milionë euro për pajisje për personat paraplegjikë dhe tetraplegjikë.

“Faleminderit përzemërsisht organizatës “Handikos” për pritjen dhe takimin. Patëm bisedë të hapur, ku trajtuam sfidat më të mëdha dhe mënyrat për përmirësimin e jetës dhe kushte të dinjitetshme për secilën e secilin person me nevoja të veçanta. Këtë mandat kemi punësuar 422 asistentë në shkolla, investuar 6.4 milionë euro për pajisje për persona paraplegjikë dhe tetraplegjikë dhe miratuar rregulloren e re për nevojat dhe të drejtat e tyre”, ka shkruar Kurti.

Në këto zgjedhje, Lëvizja Vetëvendosje ka prezantuar pesë vendimet e para në rast se Kurti e siguron edhe një mandat si kryeministër. 

Sipas LVV-së, në mesin e këtyre vendimeve përfshihet miratimi i buxhetit rekord prej 4 miliardë euro për vitin 2026, miratimi i Ligjit të ri për Çmimet Tavan për produktet bazë, heqja e kufizimit të punësimit të veteranëve të Ushtrisë Çlirimtare (UÇK), paga e trembëdhjetë si dhe miratimi i pakos për përballje të inflacionit, në vlerë prej 200 milionë eurosh, mbështetja për pensionistët, shtesa për fëmijët, për studentët dhe për punëtorët e sektorit privat, si dhe subvencionimi i faturave të rrymës për ata që kursejnë energji elektrike.