Shia LaBeouf dënohet me kusht pasi pranoi fajësinë për sulmin ndaj tre personave gjatë Mardi Gras

Aktori Shia LaBeouf është dënuar me kusht pasi ka pranuar fajësinë për sulmin fizik ndaj tre personave jashtë një lokali në New Orleans gjatë festimeve të Mardi Gras,ka raportuar agjencia e lajmeve Associated Press.

Sipas vendimit të gjykatës, LaBeouf duhet të ndjekë një program trajtimi për alkoolin. Avokatja e tij, Sarah Chervinsky, ka konfirmuar se aktori e ka pranuar përgjegjësinë për veprimet e tij.

LaBeouf, i njohur më së shumti për rolet kryesore në filmat “Transformers” dhe “Indiana Jones and the Kingdom of the Crystal Skull”, ishte arrestuar më 17 shkurt pranë lagjes historike French Quarter në New Orleans.

Pamjet video të incidentit e tregojnë aktorin pa bluzë jashtë një lokali, duke rrëzuar një person në tokë dhe duke goditur një tjetër në fytyrë. Sipas raportit policor, goditja mund t’i ketë shkaktuar viktimës zhvendosje të hundës. Policia gjithashtu ka deklaruar se LaBeouf kishte përdorur vazhdimisht fyerje homofobike, përfshirë edhe gjatë arrestimit të tij.

Aktori ka pranuar fajësinë për tri akuza për sulm të thjeshtë fizik.

Gjyqtarja Juana Marine-Lombard e dënoi me gjashtë muaj burgim me kusht dhe dy vjet mbikëqyrje. Ai gjithashtu është urdhëruar të mos kontaktojë viktimat dhe të mos frekuentojë lokalin ku ndodhi incidenti.

Avokatja e tij e ka cilësuar ngjarjen si “një përleshje të vogël në lokal gjatë Mardi Gras” dhe ka thënë se klienti i saj dëshironte “të marrë përgjegjësinë për rolin e tij në atë që ndodhi”.

“Ai dëshiron të marrë përgjegjësinë për pjesën e tij në atë që ndodhi”, ka thënë Chervinsky, duke shtuar se nuk kishte prova që incidenti ishte i motivuar nga paragjykimet apo urrejtja.

Prokurori i distriktit të Orleansit, Jason Williams, ka thënë se zyra e tij ishte konsultuar me viktimat përpara se t’i ofronte aktorit marrëveshjen për pranimin e fajësisë.

Njëri nga personat e përfshirë në incident, artisti lokal Jeffrey Damnit, i identifikuar nga policia si Jeffrey Klein, ka deklaruar se LaBeouf e kishte shtyrë nga pas më herët gjatë mbrëmjes, duke përdorur fyerje homofobike dhe duke e kërcënuar me jetë.

Avokati i tij ka thënë se klienti shpreson që sjellja e aktorit të përmirësohet pas trajtimit për abuzimin me substancat.

“Në New Orleans të gjithë jemi të barabartë. Të gjithë duhet të ndihemi të sigurt dhe askush nuk duhet të trajtohet ndryshe për shkak të famës që ka”, ka thënë avokati Michael Kennedy.

Pas ngritjes së akuzave në muajin shkurt, një gjyqtar e ka urdhëruar LaBeouf të rikthehej në rehabilitim për drogën dhe alkoolin.

Megjithatë, pak ditë më vonë, në një intervistë me gazetarin dhe YouTuberin, Andrew Callaghan, aktori ka mohuar se kishte problem me alkoolin.

“Nuk besoj se rehabilitimi do të më ndihmojë”, ka thënë ai.

Sipas LaBeouf, sjellja e tij agresive gjatë Mardi Gras lidhej më shumë me “zemërimin dhe egon” sesa me konsumimin e alkoolit.

Ai bëri gjithashtu deklarata kontroverse për komunitetin LGBTQ+.

“Kur jam vetëm dhe pranë meje janë tre burra homoseksualë që më prekin këmbën, unë frikësohem. Më vjen keq. Nëse kjo konsiderohet homofobi, atëherë jam i tillë”, ka thënë ai.

LaBeouf, i cili u konvertua në fenë katolike disa vite më parë, ka pasur disa përplasje me ligjin gjatë karrierës së tij.

Në vitin 2017 ai u arrestua në New York nën dyshimin për sulm fizik. Po atë vit, gjatë xhirimeve të filmit “The Peanut Butter Falcon” në Georgia, u arrestua për dehje në publik dhe u akuzua për sjellje të çrregullt dhe pengim të policisë, duke u dënuar më pas me kusht.

Në vitin 2020 ai u përball me akuza për sulm të lehtë fizik dhe vjedhje të vogël në Los Angeles.

Po atë vit, këngëtarja dhe aktorja britanike FKA Twigs ngriti një padi civile kundër tij, duke e akuzuar për abuzim fizik dhe emocional gjatë lidhjes së tyre. Çështja u mbyll me marrëveshje në muajin korrik të atij viti.

Shia LaBeouf e nisi karrierën si fëmijë aktor dhe fitoi famë falë rolit të tij në serialin televiziv të Disney Channelit, “Even Stevens”.