Filmi i ri i George Clooneyt po vlerësohet si “kryevepër e krizës së moshës së mesme”

Në filmin e tij më të ri, që sapo u shfaq premierë në Festivalin e Filmit në Venecia, George Clooney luan një aktor të famshëm që përballet me boshllëkun e brendshëm dhe me jetën që ka humbur pas dekadash suksesi, ka shkruar BBC.

Traileri i filmit "Jay Kelly":
 

Në një moment, një personazh i thotë: “Ti je ëndrra amerikane, ylli i fundit i madh i kinemasë.” Një fjali që, siç theksojnë kritikët, mund të aplikohet lehtësisht edhe për vetë Clooneyn.

Filmi me regji të Noah Baumbach, i titulluar “Jay Kelly”, tregon historinë e një ylli të madh që pas vdekjes së një miku të ngushtë dhe një përplasjeje me ish-shokun e fakultetit (luajtur nga Billy Crudup), vendos papritur të ndalojë gjithçka. Ai fluturon drejt Evropës për të kaluar kohë me vajzat e tij, duke u ndalur në Itali për të marrë një çmim për vepër jetësore.

Baumbach thotë: “Ishte diçka tërheqëse për ne ideja e një ylli filmi që përjeton krizë dhe nis një udhëtim, jo vetëm fizik, por edhe të brendshëm, psikologjik.”

Edhe pse “Jay Kelly” është i mbushur me momente që e bëjnë publikun të kënaqet, loja e Clooneyt është intime, aq sa sipas kritikëve mund ta çojë drejt nominimeve në sezonin e çmimeve.

Në film, krahas Clooneyt luajnë edhe Adam Sandler (menaxheri besnik i Kellyt), Laura Dern (agjentja për marrëdhënie me publikun) dhe Emily Mortimer (stilistja).

“Kur lexon një skenar si ky thua: ‘S’më besohet që më ka ardhur kjo dhuratë’”, ka thënë Sandler, i cili është mësuar më shumë të luaj në filma komedi.

Ai ka shtuar se gjithmonë i ka respektuar menaxherët, agjentët për marrëdhënie me publikun, të cilët e mbështesnin në çdo hap.

“Në këtë film më emocionoi të luaja një njeri të përkushtuar ndaj dikujt tjetër”, ka thënë ai.

Laura Dern e përshkroi këtë rol si një mënyrë për të nderuar njerëzit që e kanë rritur profesionalisht.

“Agjentja ime për marrëdhënie me publikun ka qenë si një figurë amë për mua, sidomos kur nisa aktrimin që 11-vjeç”, ka thënë ajo.

Kritikat nga Venecia janë të ndara.

Robbie Collin nga The Telegraph i dha pesë yje dhe e quajti filmin “kryevepër e krizës së moshës së mesme”, duke veçuar fundin si “goditje nokauti”.

Geoffrey McNab nga The Independent dha katër yje.

“Nëse Clooney po luan një tjetër variant të vetes, këtë herë e bën në mënyrë shumë më të ndjerë e të zbuluar”, ka thënë McNab.

Ndërsa Peter Bradshaw nga The Guardian e quajti filmin “të zymtë, tepër emocional dhe i përqendruar te vetja”, duke i dhënë vetëm një yll.

Vetë Clooney, 64 vjeç, ka munguar në konferencën për shtyp për shkak të një infeksioni të sinuseve.

Regjisori Baumbach bëri shaka duke thënë se “edhe yjet e kinemasë sëmuren”.

Sipas BBC, megjithatë, entuziazmi për filmin është i madh.

Emri “Jay Kelly”, siç vërejnë shumë, tingëllon i ngjashëm me George Clooney.

“Që në fillim e dinim që ky do të ishte George. Më dukej e rëndësishme që publiku të kishte një marrëdhënie me aktorin që luan këtë rol”, ka thënë Baumbach.

Me këtë rikthim, Clooney shihet si një pretendent serioz për çmimin “Golden Globe” dhe ndoshta për nominim në “Oscar”, i pari në kategorinë e aktrimit që nga filmi “The Descendants” në vitin 2012.

“Kur bën një film për një aktor, në fakt po bën një film për identitetin dhe kërkimin e vetvetes. Kjo është diçka që e bëjmë të gjithë ndërsa ecim nëpër jetë”, ka thënë ndër të tjera Baumbach.