Bebe Rexha mbështet studentët shqiptarë në Maqedoninë e Veriut: Meritojnë të drejta të barabarta

Këngëtarja shqiptare me famë botërore, Bebe Rexha, ka reaguar lidhur me protestën e paralajmëruar nga studentët shqiptarë në Maqedoni të Veriut, të cilët kërkojnë që provimi i jurisprudencës të mund të zhvillohet edhe në gjuhën shqipe.

Përmes një postimi në Instagram, ajo theksoi rëndësinë e gjuhës shqipe për identitetin kombëtar, duke kujtuar përpjekjet ndër breza për ruajtjen e saj. 

Ajo nënvizoi se Maqedonia e Veriut është shtet multietnik, i ndërtuar mbi bashkëjetesën dhe të drejtat e barabarta për të gjitha komunitetet, ku gjuha shqipe njihet si gjuhë bashkëzyrtare.

“Gjuha jonë shqipe është thellësisht e rrënjosur në identitetin tonë. Për breza me radhë, kemi luftuar për ta ruajtur dhe për ta mbajtur gjallë. Maqedonia e Veriut është një shtet multietnik i ndërtuar mbi bashkëjetesën dhe të drejtat e barabarta për të gjitha komunitetet e saj, ku gjuha shqipe njihet si gjuhë bashkëzyrtare”, ka shkruar ajo.

Në reagimin e saj, Bebe Rexha theksoi se studentët shqiptarë meritojnë të njëjtat të drejta dhe mundësi si të gjithë të tjerët.