Pesë zakone që sjellin lumturi të qëndrueshme në jetë

Sipas psikologëve, lumturia e qëndrueshme nuk vjen vetëm nga emocionet e momentit, por nga mënyra se si ndërtohet jeta.

Studimet e viteve të fundit kanë identifikuar pesë zakone që lidhen ngushtë me mirëqenien afatgjatë, ka shkruar Forbes.

Investoni në marrëdhëniet tuaja

Një nga gjetjet më të rëndësishme në kërkimet mbi lumturinë është se cilësia e marrëdhënieve të ngushta ndikon më shumë në lumturi, shëndet dhe jetëgjatësi sesa pasuria, karriera apo inteligjenca.

Studimi i famshëm i Harvardit për zhvillimin e të rriturve, i cili ka ndjekur pjesëmarrësit për më shumë se 80 vjet, ka treguar se marrëdhëniet e forta janë parashikuesi më i mirë i një jete të lumtur dhe të shëndetshme.

Mbroni kohën po aq sa paratë

Shumë njerëz ndihen vazhdimisht të zënë dhe pa kohë të mjaftueshme. Sipas studiueses Ashley Whillans nga Harvard Business School, kjo ndjenjë e “mungesës së kohës” lidhet me nivele më të ulëta kënaqësie nga jeta dhe shëndeti mendor.

Studimet kanë treguar se shpenzimi i parave për të kursyer kohë, si delegimi i disa detyrave ose thjeshtimi i angazhimeve, sjell më shumë lumturi sesa blerja e sendeve materiale.

Kërkoni sfida, jo vetëm rehati

Një studim i vitit 2022 ka prezantuar konceptin e “jetës psikologjikisht të pasur”, e cila karakterizohet nga përvoja të reja, sfiduese dhe që ndryshojnë këndvështrimin.

Udhëtimet, mësimi i gjërave të reja, sfidat krijuese dhe dalja nga zona e rehatisë mund të mos jenë gjithmonë të këndshme në moment, por krijojnë kujtime më të pasura dhe një ndjenjë më të thellë përmbushjeje.

Shpenzoni për të tjerët, jo vetëm për veten

Hulumtimet tregojnë se ndihma ndaj të tjerëve, qoftë me para, kohë apo mbështetje emocionale, rrit ndjeshëm mirëqenien personale.

Një analizë e vitit 2023 zbuloi se shpenzimi për të tjerët lidhet vazhdimisht me nivele më të larta lumturie, pavarësisht të ardhurave apo kulturës. Ekspertët besojnë se njerëzit janë të programuar biologjikisht për të bashkëpunuar dhe kontribuar në komunitet.

Kaloni të paktën 120 minuta në javë në natyrë

Një studim i publikuar në vitin 2019, ku morën pjesë gati 20 mijë persona, zbuloi se ata që kalonin të paktën dy orë në javë në natyrë kishin shëndet fizik dhe mendor më të mirë.

Koha në natyrë ndihmon në uljen e stresit, qetësimin e mendjes dhe rikthimin e energjisë mendore. Këto 120 minuta mund të ndahen në shëtitje të shkurtra gjatë javës.

Çka ndodh kur këto zakone bashkohen?

Sipas studiuesve, lumturia nuk është diçka që arrihet vetëm përmes mendimit pozitiv apo suksesit personal. Ajo ndërtohet përmes një kombinimi faktorësh: marrëdhënie të forta, kontroll mbi kohën, përvoja të pasura, ndihmë ndaj të tjerëve dhe kontakt i rregullt me natyrën.

Sipas ekspertëve, sekreti nuk është të pyesim “si të ndihem më i lumtur?”, por “si të ndërtoj një jetë që krijon natyrshëm lumturi?”.

Kjo kërkon kohë dhe përkushtim, por provat shkencore sugjerojnë se është rruga më e sigurt drejt mirëqenies afatgjatë.