Qeveria rikthen në punë të sanksionuarin nga SHBA-ja

Nexhat Krasniqi është kthyer në punë në Ministri të Infrastrukturës, as dy javë pasi u suspendua për shkak të sanksionimit të tij nga SHBA-ja. Ai u suspendua nga pozita e udhëheqësit të prokurimit, e është kthyer si drejtor i Departamentit të Infrastrukturës Rrugore në të njëjtën Ministri. Askush nga Ministria nuk ka pranuar të deklarohet mbi arsyet e kthimit të Krasniqit në punë

Ministria e Infrastrukturës e ka kthyer në punë Nexhat Krasniqin, më pak se dy javë prej kur e ka suspenduar pas vendimit të Departamentit Amerikan të Shtetit për ta sanksionuar.

Krasniqi, i cili më 3 nëntor u suspendua nga pozita e udhëheqësit të Divizionit të Prokurimit në Ministrinë e Infrastrukturës, më 15 nëntor u kthye përkohësisht në pozitën e drejtorit të Departamentit të Infrastrukturës Rrugore, me vendim të sekretarit të përgjithshëm, Izedin Bytyqi.

Mbi arsyet e kthimit të tij në punë, KOHA i ka dërguar pyetje Ministrisë së Infrastrukturës, por nuk ka marrë përgjigje. Ndërkaq kontakti me ministrin Liburn Aliu nuk ka qenë i mundur.

Zëvendësi i tij, Hysen Durmishi, e ka referuar KOHËN që ta kontaktojë sekretarin Bytyqi, duke thënë se kthimi në punë i Krasniqit nuk është çështje e tij e as e ministrit. Por, sekretari nuk ka qenë i qasshëm.

As Ambasada amerikane në Kosovë nuk ka dhënë një koment mbi vendimin e Ministrisë për ta rikthyer në punë të sanksionuarin nga SHBA-ja.

Krasniqi, që në Kosovë njihet si “baba i tenderëve”, është vendosur në listën e sanksioneve të SHBA-së, nën arsyetimin për përfshirje të tij në korrupsion të madh gjatë kohës sa ka qenë drejtor i Departamentit të Prokurimit në Ministrinë e Tregtisë dhe Industrisë. Në vendimin për sanksionim, Departamenti i Shtetit ka thënë se Krasniqi ka abuzuar me postin e tij publik duke marrë ryshfet në këmbim të dhënies së kontratës për lejimin e ndërtimit të Parkut Industrial në Komunën e Drenasit, nga kompania “Eltoni”.

“Ky vendim riafrimon përkushtimin e SHBA-së për luftimin e korrupsionit që dëmton interesat publike, pengon prosperitetin ekonomik të shteteve dhe zvogëlon aftësitë e qeverive për t’iu përgjigjur në mënyrë efektive nevojave të shtetasve të tyre”, është shkruar në njoftimin e Departamentit Amerikan të Shtetit, për sanksionimin e Krasniqit dhe është bërë e ditur se atij dhe dy fëmijëve të tij u është ndaluar hyrja në Shtetet e Bashkuara.

Për rastin për të cilin është sanksionuar, Themelorja në Prishtinë e ka dënuar Krasniqin me 26 muaj burgim efektiv, ndërsa pas ankimit në Apel dënimi i është zvogëluar në 18 muaj burgim me kusht, por nuk i është ndaluar ushtrimi i funksionit publik.