Arrestohet një 35-vjeçar për sulm ndaj policëve në Ferizaj

Një person me inicialet A.N., 35 vjeç, është arrestuar të premten pasdite në Ferizaj, pasi dyshohet se ka sulmuar policët gjatë kryerjes së detyrës zyrtare.

Sipas Policisë, një zyrtar policor i caktuar në detyrë në portën hyrëse të stacionit policor ka njoftuar se një veturë me targa të huaja ishte parkuar para portës dhe se drejtuesi i saj nuk po i bindej urdhrave për t’u larguar.

Në vendngjarje kanë dalë për asistencë edhe zyrtarë të tjerë policorë, ndërsa i dyshuari, A.N., 35 vjeç, sipas policisë, ka përdorur vazhdimisht fjalë fyese dhe kërcënuese ndaj zyrtarëve policorë, duke shfaqur sjellje agresive dhe mosbindëse.

Gjatë ndërhyrjes, i dyshuari u është vërsulur zyrtarëve policorë, me ç’rast ata janë detyruar të përdorin sprej mbrojtës për ta neutralizuar dhe më pas për ta arrestuar.

Si pasojë e incidentit, tre policë, si dhe i dyshuari, kanë pësuar lëndime të lehta.

I dyshuari është ndaluar për 48 orë.