Mbrojtësi Albian Hajdari dhe mesfushori Meriton Korenica besojnë se Kosova ka skuadër për ta fituar ndeshjen kundër Sllovenisë në Lubjanë.
Ndeshja zhvillohet të shtunën nga ora 20:45 dhe i takon kualifikimeve për Kupën e Botës 2026. Është ndeshja e parafundit kualifikuese për të dyja përfaqësueset.
“Ne do të përgatisim lojën kundër Sllovenisë për të marrë maksimumin, tri pikët. Nuk është e lehtë të analizohet kundërshtari, sepse ndeshjen e parë e kemi luajtur këtu në ‘Fadil Vokrri’, kurse tani luajmë në Lubjanë. E dimë se na pret një ndeshje e vështirë, por trajneri është duke na përgatitur shumë mirë që në ditën e lojës ta japim maksimumin”, ka thënë Hajdari.
Loja me presion të lartë, qarkullimi i shpejtë i topit dhe koordinimi në fazën mbrojtëse, kanë qenë disa nga elementet e punës së bërë të mërkurën nga Përfaqësuesja.
“Gjithçka po shkon shumë mirë dhe shpresoj që të marrim rezultate pozitive dhe të bëjmë historinë e Kosovës. Dalëngadalë kemi filluar të punojmë në aspektin taktik. Ne kemi treguar lojëra shumë të mira dhe shpresoj të vazhdojmë tutje me këtë formë të lartë”, u shpreh Korenica.
Me ndeshjen kundër Zvicrës të martën e ardhshme, Kosova e mbyll kampanjën kualifikuese për Botërorin që vitin e ardhshëm. Ka entuziazëm për kualifikim historik.