-
Nga:
Arsim Maxhera
- 29 gusht 2025 16:39
- Shpërndaje në:
Përzgjedhësi i Kosovës, Franco Foda, e ka publikuar të premten listën për ndeshjet e para kualifikuese për Kupën e Botës 2026 në futboll.
Kosova më 5 shtator luan në Basel ndaj Zvicrës, ndërsa më 8 shtator e pret Suedinë në “Fadil Vokrri”.
Foda e ka ftuar për herë të parë mesfushorin Leon Avdullahu, që vendosi për Kosovën para Zvicrës. Është ftuar edhe Veldin Hoxha, që më herët kishte njoftuar se do të paraqitet për “Dardanët”. Hoxha po ashtu luan në mesfushë, ndërsa është pjesë e Rubin Kazanit në Rusi. Më herët ishte pjesë e të rinjve të Kroacisë.
Avdullahu luan për Hoffenheimin në Bundesligë dhe e kishte opsion edhe Zvicrën. Por vendosi për Kosovën dhe kjo solli entuziazëm tek tifozët “dardanë”.
Me ardhjen e 21-vjeçarit, Avdullahu, dhe 22-vjeçarit, Hoxha, mesfusha e Kosovës vlerësohet e kompletuar si asnjëherë më parë. Për shumë kohë ky repart ishte më problematiku në përfaqësuese.
Elvis Rexhbeçaj vlerësohet tjetër kandidat i fortë për vend në qendër të mesfushës, ndërsa konkurrojnë edhe Valon Berisha, Muharrem Jashari e Lindon Emërllahu.
Për pozitat ofenzive konkurrenca po ashtu vlerësohet e fortë. Vedat Muriqi është kandidati kryesor për qendër të sulmit, derisa mbështetës të tij mund të jenë Fisnik Asllani e Albion Rrahmani. Për pozitat anësore konkurrojnë Edon Zhegrova, Baton Zabërgja, Meriton Korenica, Florent Muslija, Ermal Krasniqi e Florian Haxha.
Në mbrojtje pritet të startojnë Amir Rrahmani e Lumbardh Dellova, ndërsa mbrojtës tjerë të qendrës janë Fidan Aliti e Ilir Krasniqi. Mërgim Vojvoda, Florent Hadërgjonaj, Leart Paqarada e Dion Gallapeni janë opsionet e Fodas për mbrojtës qendre.
Në portë nuk ka befasi, ndonëse Arijanet Muriq e Amir Shaipi janë në moment të vështirë. Është ftuar edhe Visar Bekaj.
Bie në sy mungesa e Milot Rashicës, ndërsa FFK-ja nuk ka dhënë ndonjë njoftim për mungesën e tij në listë. Rashica nuk luajti në ndeshjen e fundit për Beshiktashin dhe sipas mediave turke e ka kërkuar largimin nga kjo skuadër. Rashica është i pakënaqur me qasjen e tifozëve ndaj tij.
Rashica madje nuk është as në listën rezervë.
Këtë herë vend në përfaqësuese nuk ka për mesfushorin Bledian Krasniqi dhe lojtarin e krahut, Donat Rrudhani. Të dy janë në listën rezervë, së bashku me Faton Malokun, Leard Sadriun, Ron Raqin, Andi Hotin, Kreshnik Hajrizin, Ismet Lushakun, Behar Nezirin, Kreshnik Krasniqin, Lirjon Abdullahun e Rilind Nivokazin.
Përfaqësuesja mblidhet të hënën, më 1 shtator, kur Foda do të flasë për zgjedhjet e bëra.
Kosova është në seri prej pesë fitoreve. Në qershor i fitoi miqësoret me Armeninë dhe Komoret, ndërsa në mars i fitoi ndeshjet e plejofit të Ligës së Kombeve ndaj Islandës.
Por momenti i vërtetë fillon më 5 shtator, kur nisin kualifikimet për Botërorin e vitit të ardhshëm. Kualifikimi në një ngjarje të madhe mbetet synimi kryesor i “Dardanëve”.
Lista e Kosovës për ndeshjet me Zvicrën dhe Suedinë
Portierë: Arjanet Muriq, Amir Shaipi, Visar Bekaj.
Mbrojtës: Mërgim Vojvoda, Florent Hadërgjonaj, Amir Rrahmani, Lumbardh Dellova, Ilir Krasniqi, Fidan Aliti, Leart Paqarada, Dion Gallapeni.
Mesfushorë/sulmues: Elvis Rexhbeçaj, Valon Berisha, Veldin Hoxha, Lindon Emërllahu, Leon Avdullahu, Ermal Krasniqi, Florian Haxha, Muharrem Jashari, Edon Zhegrova, Baton Zabërgja, Meriton Korenica, Florent Muslija, Albion Rrahmani, Fisnik Asllani, Vedat Muriqi.
Lista rezervë: Faton Maloku, Leard Sadriu, Ron Raqi, Andi Hoti, Donat Rrudhani, Kreshnik Hajrizi, Ismet Lushaku, Behar Neziri, Kreshnik Krasniqi, Lirjon Abdullahu, Bledian Krasniqi, Rilind Nivokazi.