Kosova e Shqipëria nuk përballen në plejof

Shqipëria do të luajë në plejof për kualifikim në Botërorin 2026, ndërsa paraqitjen në plejof e ka të garantuar edhe Kosova.

Por Kosova me fitore 6:0 të martën ndaj Zvicrës, kualifikohet direkt. Kjo ka fare pak gjasa të ndodhë, kështu që edhe te Kosova pritet të bëhen gati për plejof.

Nëse vazhdon në plejof, është e sigurt që Kosova do të jetë në vazon e tretë. Dhe rrjedhimisht do të luajë me një përfaqësuese të vazos së dytë në gjysmëfinale të plejofit, kurse do të jetë mysafire. 

Në vazon e tretë do të jetë edhe Shqipëria. Kjo u bë e qartë të dielën mbrëma, kur Shqipëria pësoi nga Anglia dhe Ukraina fitoi ndaj Islandës. 

Sipas pozitave aktuale në grupe, në vazon e tretë për short do të jenë edhe Irlanda dhe Bosnjë-Hercegovina. Megjithatë edhe Bosnjë-Hercegovina, njëjtë si Kosova, është në garë për kualifikim direkt. Rrjedhimisht shumë gjëra mund të ndryshojnë deri të martën mbrëma, kur përfundojnë kualifikimet e rregullta evropiane për Botërorin 2026.

Në vazon e dytë, pra rivale potenciale të Kosovës, mund të jenë Uellsi, Skocia, Sllovakia e Çekia. Por varësisht nga rezultatet kjo katërshe mund të ndryshojë. 

Renditja nëpër vazo bëhet në bazë të ranglistës së FIFA-s.

Shorti për plejof tërhiqet të enjten, ndërsa të mërkurën publikohet ranglista e FIFA-s, në bazë të cilës ndahen përfaqësueset në vazo. 

Në vazon e parë pritet të jenë Italia, Turqia, Ukraina e Polonia. Në të katërtën do të jenë fituese të grupeve në Ligën e Kombeve, që nuk përfundojnë në dy pozitat e para në kualifikimet e rregullta. Në vazon e katërt mund të jenë Suedia, Rumania, Maqedonia e Veriut dhe Irlanda e Veriut.

Në gjysmëfinale, përfaqësueset e vazos së parë takohen me ato të vazos së katërt. Përfaqësueset e vazos së parë janë vendase.

Për finale të plejofit, vendasi do të përcaktohet me short.

Prej 16 përfaqësueseve në plejof, katër do të kualifikohen në Botëror.

Gjysmëfinalet e plejofit janë më 26 mars, ndërsa finalet më 31 mars.