Ushtria ukrainase ka njoftuar të premten se forcat e saj rrëzuan shtatë nga 14 raketat dhe të 17 dronët e lëshuar nga Rusia në sulmet e natës në perëndim të vendit.
Forcat ruse shënjestruan infrastrukturën kritike dhe objektet ushtarake gjatë sulmit, ka bërë të ditur zëdhënësi i forcave ajrore ukrainase, Illia Yevlash në televizionin kombëtar.
Ushtria ukrainase shkatërroi 11 objektiva ajrore mbi rajonin perëndimor të Khmelnytskyit, sipas guvernatorit. Një sulm shkaktoi zjarr në infrastrukturë, por nuk u raportua për viktima, raporton Reuters.
Mbrojtja ajrore rrëzoi shtatë nga 10 raketat Kh-101/Kh-555, njoftoi ushtria ukrainase.
Rusia ka lëshuar gjithashtu tri raketa balistike Iskander-M, që synonin rajonin e Zaporizhzhias, dhe një raketë balistike të lëshuar nga ajri Kinzhal në sulmin e saj, sipas Yevlashit.
Guvernatori i Zaporizhzhias ka theksuar se një raketë goditi një zonë të hapur, pa dëme e as viktima të raportuara.
Forcat ajrore shkatërruan gjithashtu pesë dronë mbi rajonin e Dnipropetrovskut, tha guvernatori i saj, pa dëme apo viktima.
Sulmet ajrore ruse këtë pranverë shkaktuan dëme të konsiderueshme në infrastrukturën kritike të Ukrainës.
