Industria turke e mbrojtjes po vazhdon të zgjerohet me produkte dhe koncepte të reja në fushën e dronëve. Kompania SkyDagger, e cila nisi vitin e kaluar prodhimin e dronëve kamikazë FPV — të operuar përmes syzeve ose ekranit duke krijuar ndjesinë e fluturimit në kabinë — ka zhvilluar tashmë një gamë të gjerë modelesh me madhësi të ndryshme. Tani kompania ka prezantuar edhe një variant të ri me krahë të fiksuar (sikur të aeroplanëve të zakonshëm).
Drejtori i Përgjithshëm i kompanisë Baykar, Haluk Bayraktar, ka prezantuar modelin e ri SKYDAGGER TOYCA 05 përmes një postimi në platformën NSosyal. Në videon e publikuar, droni me krahë të fiksuar, i lëshuar nga një katapult, bie në sy për manovrat e tij agresive dhe fleksibilitetin operativ, shkruan TRT.
“SKYDAGGER TOYCA 05” ka rreze veprimi deri në 70 kilometra, kokë luftarake shpërthyese prej 5 kilogramësh, komunikim “mesh” për fluturim në formacion (swarm), mbrojtje kundër ndërhyrjeve elektronike (anti-jamming) dhe mundësi operimi FPV ose fluturim tërësisht autonom.
SkyDagger njofton se ka kapacitet prodhimi prej mbi 30 mijë dronësh me krahë të fiksuar në vit.
VIDEO:
🇹🇷 Türk savunma sanayisi, mini İHA'larda yeni sayfa açıyor
🔹 FPV kamikaze dronlar üreten SkyDagger, sabit kanatlı yeni kamikaze sürü İHA SKYDAGGER TOYCA 05'i geliştirdi
🔹 Baykar ve Skydagger işbirliği ile iki farklı İHA sistemi entegre şekilde kullanıldı
🔹 Bayraktar KALKAN… pic.twitter.com/xRJ1ZRhsq2
Kompania publikoi gjithashtu pamje nga një test i rëndësishëm për industrinë turke të mbrojtjes, që lidhet me konceptin e lëshimit të dronëve nga ajri. Në testin e kryer, droni Bayraktar KALKAN — një platformë VTOL (ngritje/ulje vertikale) e zhvilluar nga Baykar — lëshoi me sukses dronin kamikaz Skydagger 7 FPV.
Ky operacion demonstron integrimin e dy sistemeve të ndryshme dronësh në një mision të vetëm. Bayraktar Kalkan shfrytëzohet për detyra të zbulimit, vrojtimit dhe inteligjencës, ndërsa mund të shërbejë edhe si platformë ajrore për lëshimin e municioneve të vogla ose dronëve kamikaz, duke rritur ndjeshëm rrezen dhe kohëzgjatjen e misioneve të tyre.