-
Përgatiti:
Blerta Haxhiu
- 25 shtator 2025 18:38
- Shpërndaje në:
Presidenti amerikan, Donald Trump ka thënë se Shtetet e Bashkuara mund t’i heqin sanksionet ndaj Turqisë dhe ta lejojnë atë të blejë avionët ushtarakë amerikanë F-35. Një njoftim të tillë Trumpi e dha në Zyrën Ovale në takimin me presidentin turk, Recep Tayyip Erdogan. Megjithatë, ai ka thënë se Ankaraja duhet të ndalë blerjen e naftës ruse.
Vizita e parë e Erdoganit në Shtëpinë e Bardhë pas një periudhe të gjatë, rreth gjashtë vitesh, ndodh në një moment kur Turqia kërkon të shfrytëzojë mundësitë që i ofron administrata amerikane, e cila është e gatshme të nënshkruajë marrëveshje të mëdha për armë dhe tregti.
Trump e përshkroi Erdoganin si njeri shumë të fortë dhe shprehu dëshirën që Turqia të ndalonte blerjen e naftës ruse, një veprim që ai e kërkon nga vendet evropiane që po blejnë naftë ruse, përfshirë edhe Hungarinë e Sllovakinë.
Presidenti amerikan theksoi se do të preferonte që Turqia të ndalonte plotësisht blerjen e naftës ruse, veçanërisht në këtë periudhë kur Rusia po vazhdon agresionin ndaj Ukrainës.
Në lidhje me mundësinë e një marrëveshjeje për shitjen e avionëve luftarakë F-35, Trump sugjeroi se Erdogani do të ishte në gjendje të sigurojë ato që dëshiron të blejë dhe shprehu optimizëm për mundësinë e një marrëveshjeje të suksesshme.
Ai gjithashtu tha se mund të heqë sanksionet ndaj Turqisë në një afat të shkurtër, madje mund ta bëjë këtë shumë shpejt nëse takimi shkon mirë.