-
Përktheu:
Flutura Gashi-Mehmeti
- 14 prill 2026 19:10
- Shpërndaje në:
Kremlini ka thënë të martën se ishte i kënaqur që kryeministri i zgjedhur i Hungarisë, Peter Magyar, dukej i hapur për dialog pragmatik, teksa Moska po ndjek një qasje “prit dhe shiko” pas humbjes në zgjedhje të partnerit të saj më të afërt në Evropë, Viktor Orban.
“Tani për tani, mund të vërejmë me kënaqësi, aq sa e kuptojmë, gatishmërinë e tij për t’u angazhuar në dialog pragmatik”, ka thënë zëdhënësi i Kremlinit, Dmitry Peskov.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“Në këtë rast, ekziston vullnet i ndërsjellë nga ana jonë dhe më pas do të veprojmë në bazë të hapave konkretë që do të ndërmarrë qeveria e re hungareze”, ka shtuar ai.
Moska, një ditë më parë, nuk e uroi Magyar për fitoren e tij në zgjedhje. Në vend të kësaj, Peskov bëri të qartë se Hungaria nuk gëzon më ndonjë status të veçantë dhe tani hyn në kategorinë e “vendeve jo-miqësore”, së bashku me pjesën tjetër të Evropës.
Por përmasat e humbjes së Orbanit e kanë lënë Moskën pa shumë zgjedhje, përveçse të pranojë humbjen e një partneri kyç në Evropë.
“Hungaria bëri zgjedhjen e saj. Ne e respektojmë atë zgjedhje”, ka thënë Peskov të hënën.
Moska duket se po përpiqet të minimizojë humbjen e një aleati të rëndësishëm në Evropë, duke përdorur një ton të ngjashëm me atë pas rënies së Bashar al-Assad. Atëherë, Kremlini u distancua shpejt nga Assadi, duke u përpjekur të ruajë çfarëdo ndikimi që mund të kishte me udhëheqjen e re të Sirisë.
“Nuk kemi qenë kurrë miq me Orbanin”, ka thënë Peskov, duke shtuar se Moska mbetet e hapur për dialog dhe për ndërtimin e marrëdhënieve të mira dhe reciprokisht të dobishme me Budapestin.
Magyar sinjalizoi në deklaratat e tij të para të hënën se nuk duhet pritur një prishje drastike me Rusinë.
Ai sugjeroi se Hungaria do të vazhdojë një politikë të jashtme pragmatike, duke vazhduar të blejë naftë ruse dhe duke mbajtur një qëndrim të kujdesshëm ndaj Ukrainës, edhe pse synon të ribalancojë marrëdhëniet me Perëndimin.
“Nuk mund ta ndryshojmë gjeografinë,” u ka thënë ai gazetarëve, duke shtuar se Hungaria duhet të gjejë një rrugë përpara për importet e energjisë, përfshirë ato nga Rusia.
Kryeministri i ardhshëm do të trashëgojë një ekonomi hungareze në vështirësi që mbetet shumë e varur nga Rusia, e cila furnizon më shumë se 80% të gazit fosil dhe naftës bruto, një varësi që pritet t’i japë Moskës ndikim në Hungari për vite me radhë.
“Rusia do të jetë aty, Hungaria do të jetë këtu. Por ne do të përpiqemi të diversifikojmë”, ka thënë Magyar.
Megjithatë, ai e ka bërë të qartë se nuk ka interes të luajë rolin që Orban kishte për Putinin.
Veçanërisht, kryeministri i ardhshëm nuk la vend për interpretim se ai e sheh Rusinë si agresore në konfliktin me Ukrainën.
“Nëse Vladimir Putin telefonon, unë do ta hap telefonin”, ka thënë ai.
“Nëse do të flisnim, do t’i thosha se do të ishte mirë të ndalej vrasja pas katër vjetësh dhe të përfundonte lufta”, ka shtuar ai.
Deklarata e tij shënon një pikëpamje dukshëm ndryshe nga retorika e Orbanit ndaj pushtimit në shkallë të plotë të Rusisë. Për vite me radhë, Orban dhe Putin nuk e mbajtën sekret admirimin e tyre të ndërsjellë, dhe dobinë për njëri-tjetrin, si në publikisht ashtu edhe privatisht.
Që nga fillimi i luftës së Rusisë në vitin 2022, Hungaria ka punuar sistematikisht për të zbutur përgjigjen e BE-së, duke lobuar për të dobësuar sanksionet, duke bllokuar vazhdimisht ndihmën për Kievin dhe së fundmi duke vënë veton ndaj një kredie të BE-së me vlerë miliarda euro për të cilën Ukraina ka nevojë urgjente për t'i bërë ballë agresionit rus.