-
Nga:
Associated Press
- 13 prill 2026 08:00
- Shpërndaje në:
Ushtria e Shteteve të Bashkuara njoftoi se do të fillojë një bllokadë ndaj të gjitha porteve dhe zonave bregdetare të Iranit të hënën, duke zbutur zotimin e mëhershëm të presidentit Donald Trump për të bllokuar plotësisht Ngushticën strategjike të Hormuzit, pasi raportet e para tregonin se anijet kishin ndalur kalimin në këtë rrugë ujore.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoKy veprim erdhi pasi bisedimet maratonë për armëpushim mes SHBA-së dhe Iranit në Pakistan përfunduan pa marrëveshje, duke krijuar terrenin për një përballje të mundshme. Udhëheqësit iranianë u zotuan se do t’i kundërpërgjigjen bllokadës.
Komanda Qendrore e SHBA-së (CENTCOM) njoftoi se bllokada do të nisë të hënën në orën 10:00 sipas kohës lindore të SHBA-së (EDT), ose në orën 17:30 në Iran, dhe do të “zbatohet në mënyrë të paanshme ndaj anijeve të të gjitha vendeve që hyjnë ose dalin nga portet dhe zonat bregdetare iraniane, përfshirë të gjitha portet iraniane në Gjirin Arabik dhe Gjirin e Omanit”. CENTCOM shtoi se do të lejojë ende anijet që udhëtojnë mes porteve jo-iraniane të kalojnë nëpër ngushticë, një tërheqje nga kërcënimi i mëhershëm i presidentit për të bllokuar të gjithë ngushticën.
Trump më vonë konfirmoi kohën e nisjes në një postim në rrjetin e tij Truth Social.
Njoftimi për bllokadën ndaloi trafikun e kufizuar të anijeve që ishte rifilluar në ngushticë pas armëpushimit, sipas një raporti të hershëm nga Lloyd’s List Intelligence. Sipas gjurmuesve detarë, mbi 40 anije tregtare kanë kaluar që nga fillimi i armëpushimit, nga rreth 100 deri në 135 kalime anijesh në ditë para luftës.
Më vonë gjatë së dielës, Trump e zgjeroi përplasjen e tij lidhur me luftën me Papën Leo XIV, duke e kritikuar ashpër në një postim në Truth Social, ku e quajti liderin katolik “të dobët në politikën e jashtme”. Kjo deklaratë e pazakontë erdhi pasi Papa Leo kishte dënuar luftën dhe kishte kërkuar që liderët politikë të ndalen dhe të negociojnë për paqe.
Trumpi e quan Papa Leonin “të dobët ndaj krimit dhe tmerrshëm për politikën e jashtme”
Presidenti i SHBA-së, Donald Trump, kritikoi Papa Leonin vonë të dielën, në një sulm të pazakontë dhe të drejtpërdrejtë ndaj udhëheqësit të Kishës Katolike me 1.4 miliardë anëtarë, i cili shkaktoi menjëherë reagime kritike nga besimtarët, shkruan Reuters.
Presidenti, në një përgjigje të dukshme ndaj kritikave në rritje të Papës për luftën SHBA-Izrael kundër Iranit dhe politikat e ashpra të administratës Trump për imigracionin, tha se Leo ishte “i tmerrshëm”.
"Papa Leo është i dobët ndaj krimit dhe i tmerrshëm për politikën e jashtme", shkroi Trump në një postim në Truth Social.
Leo, me origjinë nga Çikago, është Papa i parë amerikan. I njohur për zgjedhjen e fjalëve me kujdes, ai është shfaqur si një kritik i hapur i luftës në Iran në javët e fundit dhe e ka kritikuar “çmendurinë e luftës” në një apel paqeje të shtunën.
Vitin e kaluar, ai vuri në dyshim nëse politikat e ashpra të administratës Trump për imigracionin ishin në përputhje me mësimet pro-jetë të Kishës.
“Dikush që thotë, ‘Unë jam kundër abortit, por jam dakord me trajtimin çnjerëzor të emigrantëve në Shtetet e Bashkuara’, nuk e di nëse kjo është pro-jetës”, tha Papa në shtator.
Trumpi shkroi në postimin e tij të dielën se “Leo duhet të rikuperojë veten si Papë”, duke u thënë më vonë gazetarëve se “nuk ishte një tifoz i madh” i Papës.
Britania refuzon t’i bashkohet bllokadës së Trumpit ndaj Iranit në Ngushticën e Hormuzit
Photo: Associated Press
Mbretëria e Bashkuar ka konfirmuar se nuk do t’i bashkohet bllokadës detare që presidenti amerikan Donald Trump synon të vendosë ndaj porteve iraniane në Ngushticën e Hormuzit.
Sipas deklaratave zyrtare, Londra nuk do të përdorë anije luftarake apo trupa për të zbatuar këtë bllokadë, duke u distancuar nga strategjia amerikane në këtë përshkallëzim të tensioneve me Iranin.
Në vend të kësaj, qeveria britanike thekson se prioriteti i saj mbetet, ruajtja e lirisë së lundrimit dhe rihapja e Ngushticës së Hormuzit, një rrugë kyçe për furnizimin global me naftë.
Zyrtarët britanikë kanë bërë të qartë se përfshirja në një bllokadë mund të rrisë më tej tensionet ndërkombëtare, prandaj po punojnë me aleatë si Franca për të siguruar kalim të sigurt të anijeve, pa hyrë në veprime ushtarake kundër Iranit.
Trump: Nuk më intereson nëse Irani kthehet në negociata
Photo: Associated Press
Presidenti amerikan, Donald Trump ka thënë se nuk i intereson në Irani do të kthehet në tavolinën e bisedimeve.
Duke folur me gazetarët jashtë Washington pasi u kthye nga Florida, Donald Trump u pyet se sa kohë mund të kalonte para se zyrtarët iranianë të ktheheshin në tryezën e negociatave, në mes të një armëpushimi të brishtë.
“Nuk më intereson nëse kthehen apo jo,” u përgjigj ai. “Nëse nuk kthehen, për mua është në rregull.”
Trumpi tha se gjatë negociatave të fundjavës të udhëhequra nga zëvendëspresidenti amerikan JD Vance, Irani kishte thënë se po synonte të siguronte një armë bërthamore.
“Ata ende e duan atë, dhe këtë e bënë të qartë atë natë. Irani nuk do të ketë një armë bërthamore,” tha ai.