Shtetet e Bashkuara dhe Irani shkëmbyen sulme me cak infrastrukturën dhe objektivat ushtarake të shtunën, ndërsa beteja e tyre mbi Ngushticën e Hormuzit u intensifikua.
Rajoni është përballur me ditë të tëra sulmesh të ndërsjella në një konflikt që përqendrohet gjithnjë e më shumë në kontrollin e Ngushticës. Prishja e një armëpushimi të përkohshëm nuk lë një fund të qartë në horizont për luftën që SHBA-ja dhe Izraeli filluan më shumë se katër muaj më parë.
Komanda Qendrore e SHBA-së njoftoi të shtunën në mëngjes se në natën e shtatë radhazi të sulmeve kishte goditur "vende mbikëqyrjeje, infrastrukturë logjistike ushtarake, magazina armësh nëntokësore dhe aftësi detare".
Kuvajti të shtunën deklaroi se ka penguar raketa dhe dronë iranianë mbi qiellin e tij, ndërsa Iraku njoftoi se kishte rrëzuar dronë mbi qytetin e Irbilit. Agjencia shtetërore e lajmeve Petra e Jordanisë raportoi se sistemet e mbrojtjes ajrore kishin rrëzuar raketa iraniane, ndërsa sirenat ajrore u dëgjuan në Bahrejn sipas qeverisë atje.
Sulmet ajrore amerikane të kryera të premten shembën një kullë në portin Chabahar të Iranit në Gjirin e Omanit, një rrugë kyç tregtare për Afganistanin fqinj, njoftoi agjencia shtetërore e lajmeve IRNA dhe e konfirmoi më vonë ushtria amerikane.
Të premten, Katari paralajmëroi njerëzit të strehoheshin, ndërsa një breshëri raketash iraniane shënjestroi vendin. Njerëzit dëgjuan shpërthime, ndërsa mbrojtja ajrore u aktivizua për të penguar raketat.
Zyrtarët iranianë thonë se sulmet e fundit amerikane kanë vrarë dhjetëra njerëz dhe kanë plagosur qindra, me viktima të reja të raportuara të premten.
Para se të fillonte lufta, SHBA-ja kishte qenë në bisedime me Iranin mbi programin e tij bërthamor. Presidenti amerikan Donald Trump tani përballet me presion politik për ta mbyllur luftën dhe për ta shmangur konfliktin e zgjatur në Lindjen e Mesme, kundër të cilit kishte bërë fushatë.
Garda iraniane paralajmëron se sulmet e SHBA-së do të çojnë në ofensivë në shkallë të plotë
Mohsen Rezaei, zyrtar i lartë i Korpusit të Gardës Revolucionare Islamike (IRGC) dhe këshilltar ushtarak i udhëheqësit suprem Mojtaba Khamenei, paralajmëroi Shtetet e Bashkuara për një "ofensivë në shkallë të plotë" nëse ajo vazhdon me sulme ushtarake kundër Iranit.
"Nëse sulmet e SHBA-së vazhdojnë për dy ose tre ditë të tjera, ne do të hyjmë në një fazë operacionesh ofensive në shkallë të plotë", ka thënë Rezaei në një intervistë për televizionin shtetëror të Iranit (IRIB).
Komentet e tij vijnë ndërsa SHBA-ja përfundoi ditën e shtatë radhazi të sulmeve ndaj Iranit dhe hakmarrjes iraniane ndaj aleatëve arabë të SHBA-së.
"Asnjë kufi politik nuk do të jetë i sigurt kundër forcave ofensive të Iranit", shtoi Rezaei dhe theksoi se SHBA-së duhet t'i kërkohet të paguajë dëmshpërblime financiare për ato që zyrtarët iranianë i kanë karakterizuar si sulme ndaj infrastrukturës civile, e të cilat SHBA-ja i mohoi.
Kërcënimet e Rezaeit pasqyrojnë kryesisht ato të bëra së fundmi nga presidenti i SHBA-së Donald Trump, i cili e kishte shpallur armëpushimin dhe memorandumin e mirëkuptimit SHBA-Iran, tashmë të brishtë, "të përfunduar", ndërsa SHBA-ja nisi sulme të reja në vend. Irani është hakmarrë duke goditur bazat amerikane brenda territorit të disa prej aleatëve të tij arabë, përfshirë Katarin, Kuvajtin dhe Bahrejnin.
-
SHBA-ja nis valë të re sulmesh, Irani thotë se është goditur infrastruktura civile
-
SHBA-ja shtrin sulmet në veri të Iranit
-
SHBA-ja nis sulme të reja ndaj Iranit, godet një ishull në Hormuz
-
SHBA-ja vazhdon sulmet ndaj Iranit
-
Nga memorandumi i mirëkuptimit te përplasja për Hormuzin – Çka po ndodh mes SHBA-së dhe Iranit?