Rusia ka vazhduar sulmet ajrore ndaj Ukrainës gjatë natës, vetëm pak orë pasi presidenti ukrainas Volodymyr Zelensky ka thënë se ka pasur telefonatë “shumë konstruktive” me ekipin negociator të presidentit amerikan Donald Trump, pas tre ditësh bisedimesh në Florida.
Herët të dielën, kryetari i Kremenchukut, Vitaliy Maletsky – një qendër e rëndësishme industriale në Ukrainën qendrore – njoftoi se qyteti është goditur në mënyrë të përsëritur nga një sulm “masiv”. Deri tani nuk janë konfirmuar viktima.
Ndërkohë, Rusia ka thënë se ka rrëzuar 77 dronë ukrainas në disa zona.
Sulmet ajrore po vazhdojnë edhe pse përpjekjet për të negociuar përfundimin e luftës janë intensifikuar, duke përfshirë bisedime të detajuara Ukrainë–SHBA në Miami, me synimin për të hartuar një marrëveshje paqeje të pranueshme për të dy palët.
Të shtunën, Zelensky u shpreh se është “i vendosur” të vazhdojë bashkëpunimin me SHBA-në, pasi foli me të dërguarin e Trumpit, Steve Witkoff, dhe dhëndrin e presidentit amerikan, Jared Kushner, në përfundim të negociatave.
Zelensky u shpreh se palët kanë diskutuar se si të sigurohet që Rusia të respektojë çdo marrëveshje të mundshme për t’i dhënë fund luftës.
Disa orë më vonë, kryetari i Kremenchukut, Vitaliy Maletsky, deklaroi se qyteti kishte pësuar “sulm të kombinuar masiv” mbi infrastrukturën e tij. Shkalla e dëmeve mbetej e paqartë të dielën në mëngjes, por kryetari bëri të ditur se disa zona ishin lënë pa ujë, rrymë dhe ngrohje.
Qyteti, i cili gjendet afërsisht në gjysmë të rrugës mes Kievit dhe vijës së frontit në lindje, është goditur në mënyrë të përsëritur që prej nisjes së pushtimit të plotë rus në shkurt 2022.
Shtëpia e Bardhë ka ushtruar presion ndaj Kievit dhe Moskës për të rënë dakord mbi një plan shumëpikësh për t’i dhënë fund luftës, por deri tani ka pasur pak shenja përparimi, pavarësisht përfshirjes së të dy palëve në procesin e udhëhequr nga SHBA-ja.