-
Përktheu:
Flutura Gashi-Mehmeti
- 16 dhjetor 2025 17:50
- Shpërndaje në:
Autoritetet ruse të martën e kanë quajtur transmetuesin publik gjerman Deutsche Welle si një "organizatë të padëshirueshme", duke e ndaluar në mënyrë efektive veprimtarinë e tij në vend.
Sipas ligjit rus, përfshirja me një "organizatë të padëshirueshme", përfshirë ndarjen e përmbajtjes së saj, është një vepër penale.
Deutsche Welle u shtua në listën e organizatave të padëshirueshme të Ministrisë së Drejtësisë ruse pas një njoftimi të shtunën nga ligjvënësi Vasily Piskaryov, i cili kryeson një komision parlamentar, për ndërhyrjet e huaja në punët ruse.
Piskaryov gjithashtu kritikoi programin e akademisë së transmetuesit, duke e akuzuar atë për trajnimin e "specialistëve të dezinformimit".
Në një deklaratë, drejtoresha e Përgjithshme e Deutsche Welle, Barbara Massing, e quajti këtë përcaktim si përpjekjen e fundit të Rusisë për të heshtur median e pavarur.
"Ne do të vazhdojmë të raportojmë në mënyrë të pavarur mbi luftën e agresionit kundër Ukrainës dhe tema të tjera për të cilat ka pak informacion në Rusi, në mënyrë që njerëzit të mund të formojnë mendimet e tyre", ka thënë ajo.
Ministria e Jashtme e Rusisë ka mbyllur zyrën e Deutsche Welle në Moskë pak para pushtimit të plotë të Ukrainës nga Moska në shkurt 2022. Ajo gjithashtu tërhoqi akreditimin për stafin e saj në hakmarrje për një veprim gjerman kundër televizionit RT të financuar nga shteti rus.
Deutsche Welle është transmetuesi publik ndërkombëtar i Gjermanisë. Financohet nga paratë e taksapaguesve, por është i pavarur nga ana editoriale. Mediumi thotë se ofron përmbajtje në 32 gjuhë.
Masat e Rusisë kundër kritikëve, gazetarëve dhe aktivistëve të Kremlinit janë intensifikuar në nivele të papara që nga pushtimi.
Lista e Rusisë e "organizatave të padëshirueshme" aktualisht mbulon më shumë se 275 entitete, duke përfshirë media të shquara të pavarura si Radio Free Europe/Radio Liberty, grupe ekspertësh si Chatham House, grupin anti-korrupsion Transparency International dhe organizatën e avokimit mjedisor WWF.