Polonia voton sot në balotazhin presidencial

Në Poloni janë hapur qendrat e votimit për rundin e dytë të zgjedhjeve presidenciale, me dy kandidatët që ofrojnë vizione rrënjësisht të ndryshme për vendin.

Në garë janë kryebashkiaku pro-evropian i Varshavës, Rafał Trzaskowski, i mbështetur nga koalicioni qeverisës politikisht i larmishëm i Donald Tuskut, kundër historianit dhe ish-boksierit amator Karol Nawrocki, i mbështetur nga partia e së djathtës populiste Ligj dhe Drejtësi (PiS) që ka qeverisur vendin midis 2015 dhe 2023, raporton The Guardian.

Ndërsa roli i presidentit polak është kryesisht ceremonial, ai mbart njëfarë ndikimi mbi politikën e jashtme dhe të mbrojtjes dhe një fuqi kritike për të vënë veton ndaj legjislacionit të ri. Kjo mund të përmbyset vetëm me një shumicë prej tre të pestat në parlament, të cilën qeveria aktuale nuk e ka.

Pritet të shihet nëse qeveria e Tuskut do të jetë në gjendje të bëjë përparim në premtimet e saj elektorale për sundimin e ligjit dhe çështjet sociale, duke përfshirë abortin dhe të drejtat LGBTQ, pas 18 muajsh bashkëjetesë të vështirë me presidentin e opozitës, Andrzej Duda.

Ndërkohë, fitorja e Nawrockit do të zgjaste ngërçin aktual, duke e bërë të vështirë për qeverinë kalimin e ndonjë reforme të madhe përpara zgjedhjeve parlamentare të 2027-ës.

Në ditët e fundit të fushatës, të dy kandidatët kanë mobilizuar mbështetësit e tyre në tubime të ndara në Varshavë.

Sondazhet tregojnë se ndryshimi midis dy kandidatëve është shumë i ngushtë.