Papa Leoni takohet me Rubion pas javësh tensione me Trumpin

Sekretari i Shtetit i SHBA-së, Marco Rubio, ka zhvilluar një takim me Papa Leon XIV të enjten, mes një periudhe historike tensionesh midis Uashingtonit dhe Vatikanit.

Vizita e Rubios vjen pas kritikave të jashtëzakonshme të presidentit, Donald Trump, ndaj papës së parë amerikan në historinë 2,000-vjeçare të Kishës Katolike, të cilat erdhën pasi papa shprehu kundërshtimin e tij ndaj operacionit ushtarak amerikan në Iran.

Leoni gjithashtu ka vazhduar të flasë për interesat e refugjatëve dhe emigrantëve, në kontrast të thellë me administratën Trump.

Aeroplani i Rubios u ul në Romë të enjten në mëngjes, gjithashtu në prag të përvjetorit të parë të Leonit si papë, përpara se Sekretari i Shtetit të drejtohej për në Pallatin Apostolik, rezidencën zyrtare të Papës, ku u zhvillua takimi.

Përpara nisjes së tij, diplomati më i lartë amerikan ka hedhur poshtë idenë se takimi me Papa Leonin është një përpjekje për të rivendosur marrëdhëniet diplomatike me Vatikanin, në të cilin SHBA-ja është mbështetur si një partner humanitar për vite me radhë. 

Ai ka pranuar, megjithatë, se "ka shumë për të folur me Vatikanin", përfshirë Kubën. 

Edhe Botë 2 muaj më parë Ministri i Jashtëm italian pas takimit me Rubion: Evropa e SHBA-ja kanë nevojë për njëra-tjetrën

“Udhëtimi nuk është i lidhur me asgjë tjetër përveç faktit se do të ishte normale për ne të angazhoheshim me ta”, ka thënë Rubio në një konferencë shtypi në Shtëpinë e Bardhë të martën.

Udhëtimi i tij në Romë dhe Vatikan vjen ndërsa Trumpi ka sulmuar jo vetëm Papën për pikëpamjet e tij mbi luftën, por edhe aleatët e hershëm evropianë të SHBA-së - duke e testuar më tej marrëdhënien transatlantike në mënyra të papara në dekada. 

Rubio do të takohet të premten me kryeministren italiane, Giorgia Meloni, mes kritikave të vazhdueshme nga Trumpi për atë që ai e ka quajtur mungesë mbështetjeje nga Italia për luftën e SHBA-së kundër Iranit.