OKB-ja voton sot rezolutën e SHBA-së për një forcë ndërkombëtare në Gazë

Këshilli i Sigurimit i OKB-së do të votojë të hënën për rezolutën e hartuar nga SHBA-ja për të ngritur një forcë ndërkombëtare stabilizimi (ISF) në Gazë.

Ndërkohë, një mocion rival është paraqitur nga Rusia dhe Kina, duke krijuar mundësinë që të dy mocionet të mund të vëhen në veto nga një ose më shumë nga pesë anëtarët e përhershëm të Këshillit të Sigurisë, raporton The Guardian.

Forca stabilizuese vjen nga plani 20-pikësh i Trumpit për Gazën, i cili gjithashtu kërkon çarmatosjen e Hamasit dhe demilitarizimin e Gazës, si dhe rindërtimin e territorit të shkatërruar dhe vendosjen e tij nën autoritetin e një administrate teknokratike palestineze që i përgjigjet përfundimisht një "bordi paqeje" që do të kryesohet nga presidenti i SHBA-së.

Forca e re, thotë drafti, do të marrë një mandat dyvjeçar sipas rezolutës, dhe do të ndihmojë në sigurimin e zonave kufitare, mbrojtjen e civilëve, sigurimin e korridoreve të ndihmës humanitare dhe punën për "çmontimin e përhershëm të armëve nga grupet e armatosura jo-shtetërore".

Teksti amerikan, i mbështetur në skicë nga shtetet e Gjirit, Franca dhe Mbretëria e Bashkuar, ka qenë subjekt i negociatave intensive, duke përfshirë futjen e një reference për formimin e ardhshëm të një shteti palestinez me këmbënguljen e Arabisë Saudite. 

Ai thotë se për sa kohë që reformat kanë ndodhur dhe rindërtimi i Gazës është në proces, atëherë "kushtet më në fund mund të jenë në vend për një rrugë të besueshme drejt vetëvendosjes dhe shtetësisë palestineze".

Teksti rival ruso-kinez është ndoshta më afër pikëpamjeve të vërteta të shteteve arabe mbi një zgjidhje me dy shtete, por vendet e Gjirit e dinë se duhet të punojnë me tekstin amerikan, pasi miratimi i Trumpit është i nevojshëm në mënyrë që Izraeli të pranojë forcën stabilizuese.

Trumpi dëshiron që forcat arabe ose myslimane të ofrojnë trupa për forcën, që do të thotë se mandati i saj dhe perspektiva e një shteti palestinez duhet të jenë të pranueshme nga ato.

Armëpushimi në Gazë sipas planit 20-pikësh të Trumpit ka hyrë në fuqi më 10 tetor. 

Faza e parë e armëpushimit parashihte kthimin e të gjitha pengjeve të gjalla dhe trupat e atyre të vdekur.

Teksa pengjet e gjalla janë kthyer të gjitha që në fillim të fazës, kanë mbetur vetëm edhe tre trupa që mbeten ende në Gazë.