OKB: 798 persona u vranë duke pritur për ndihmat humanitare në Gazë

Zyra e të Drejtave të Njeriut e Kombeve të Bashkuara (OHCHR) ka njoftuar të premten se ka evidentuar të paktën 798 të vrarë si në pikat e shpërndarjes së ndihmave të administruar nga Fondi Humanitar i Gazës, ashtu dhe afër autokolonave humanitare të drejtuara prej grupeve të tjera të ndihmës.

Fondi Humanitar i Gazës (FHG) përdor kompani private të sigurisë dhe logjistikës nga Shtetet e Bashkuara të Amerikës për të dërguar furnizime në Gaza, duke anashkaluar sistemin e udhëhequr nga OKB-ja, që sipas zyrtarëve izraelitë i ka lejuar militantët e Hamasit ta devijonin ndihmën, ka shkruar Reuters.

Organizata e Kombeve të Bashkuara e ka cilësuar planin si “të pasigurt”, si dhe ka konstatuar shkelje të parimeve humanitare.

“Deri më 7 korrik, kemi regjistruar 798 viktima, përfshirë 615 në afërsi të pikave të Fondacionit Humanitar të Gazës, dhe 183 të dyshuar që ndodhen në rrugën e autokolonave të ndihmës”, ka thënë zëdhënësja e OHCHR-së, Ravina Shamdasani, për gazetarët në Gjenevë.

FHG-ja kishte filluar shpërndarjen e pakove ushqimore në Gaza në fund të muajit maj, teksa ka mohuar në mënyrë të vazhdueshme se kanë ndodhur incidente pranë pikave të saj.