Ministri gjerman fajëson “luftën e papërgjegjshme” të Trumpit për ngadalësimin ekonomik

Ministri i Financave i Gjermanisë, Lars Klingbeil, ka fajësuar presidentin e Shteteve të Bashkuara, Donald Trump, për “luftën e papërgjegjshme në Iran”, duke thënë se kjo ka ndikuar në rënien e madhe të të hyrave tatimore të Gjermanisë, raporton BBC.

Klingbeil tha se veprimet e presidentit amerikan në Lindjen e Mesme kanë shkaktuar një “tronditje globale energjetike”.

Zyrtarët gjermanë kanë ulur parashikimet për të hyrat tatimore për periudhën 2026-2030 me rreth 70 miliardë euro.

Kjo tregon se sa shumë po e dëmton ekonominë tonë lufta në Iran”, tha Klingbeil në Berlin.
Muajin e kaluar, kancelari gjerman Friedrich Merz e zemëroi Trumpin kur sugjeroi se Shtëpia e Bardhë ishte “poshtëruar” nga negociatorët iranianë — komente që e shtynë presidentin amerikan të kërcënonte me tërheqjen e mijëra trupave amerikane nga bazat në Gjermani.

Që kur erdhi në pushtet një vit më parë, kancelari Merz ka treguar shpesh se politikat e Trumpit e kanë ndryshuar marrëdhënien tradicionalisht të ngushtë mes SHBA-së dhe Evropës.

Në shkurt, Merz tha se “është hapur një përçarje e thellë mes Evropës dhe Shteteve të Bashkuara”. 
Por kancelari gjerman e ka vizituar dy herë Shtëpinë e Bardhë brenda një viti në përpjekje për t’i zbutur tensionet në marrëdhëniet transatlantike.

Së bashku me vende të tjera evropiane, Gjermania ka qenë kritike ndaj luftës që SHBA-ja dhe Izraeli nisën kundër Iranit më 28 shkurt, e cila ka rritur ndjeshëm frikën për një ngadalësim ekonomik global.
Qeveria në Gjermani po përpiqet të nxisë ekonominë, e cila ka stagnuar prej vitesh, ndërsa kostot e larta të energjisë dhe kërkesa e dobët për eksporte kanë luajtur rol të rëndësishëm.

Muajin e kaluar, Merz u tha studentëve se “amerikanët qartazi nuk kanë strategji” dhe se ai nuk mund të shihte “çfarë dalje strategjike” do të zgjidhnin.

“Iranianët janë dukshëm shumë të aftë në negociata, ose më saktë, shumë të aftë në mosnegocim, duke i lënë amerikanët të udhëtojnë në Islamabad dhe pastaj të largohen sërish pa asnjë rezultat”, tha ai.

“I gjithë kombi” po “poshtërohej” nga udhëheqja iraniane, shtoi ai.

Trump u përgjigj të nesërmen me një postim në Truth Social, ku tha se Merz mendonte se ishte “në rregull që Irani të ketë armë bërthamore” dhe se “nuk di për çfarë po flet”.

“Nuk është çudi që Gjermania po ecën kaq keq, si ekonomikisht, ashtu edhe në aspekte të tjera!” - thuhej në postim.

Duke e vazhduar përplasjen, Trump më vonë sugjeroi që Merz duhet të përqendrohej më shumë në “rregullimin e vendit të tij të shkatërruar, veçanërisht në fushën e emigracionit dhe energjisë, dhe më pak kohë duke u përzier me ata që po eliminojnë kërcënimin bërthamor iranian”.
Më herët këtë muaj dhe vetëm disa ditë pas komenteve fillestare të Merzit, Departamenti amerikan i Mbrojtjes njoftoi një plan për tërheqjen e 5,000 trupave nga Gjermania — një urdhër që i është atribuuar Sekretarit të Mbrojtjes, Pete Hegseth.

Ministri gjerman i mbrojtjes tha se vendimi i Pentagonit ishte “i parashikueshëm”.

Dislokimi ushtarak amerikan në Gjermani është larg më i madhi në Evropë.

Trump ka qenë prej kohësh kritik i aleancës veriatlantike NATO dhe i ka qortuar aleatët që nuk iu bashkuan planeve të tij për ta rihapur rrugën strategjike detare përmes Ngushticës së Hormuzit, e cila është mbyllur efektivisht nga Irani.

Rreth 20% e naftës dhe gazit natyror të lëngshëm në botë zakonisht kalon përmes Ngushticës dhe armiqësitë kanë bërë që çmimet globale të karburanteve të rriten ndjeshëm.

Palët ndërluftuese po respektojnë një armëpushim, i cili synon të çojë drejt një marrëveshjeje për t’i dhënë fund luftës.

Të mërkurën, Trump tha se lufta do të “mbaronte shpejt”. Irani thotë se po shqyrton një propozim amerikan për t’i dhënë fund luftës.

Megjithatë, negociatat kanë ngecur pasi SHBA-ja ka vendosur bllokadë ndaj porteve iraniane — si dhe po përpiqet të hapë Ngushticën e Hormuzit për të lejuar që afro 2,000 anije të bllokuara në Gjirin Persik që nga shkurti të kalojnë pa u dëmtuar.