-
Përktheu:
Flutura Gashi-Mehmeti
- 11 janar 2026 12:30
- Shpërndaje në:
Luftëtarët e fundit kurdë janë tërhequr nga qyteti sirian i Alepos, pas njoftimit të një marrëveshjeje armëpushimi në orët e para të mëngjesit të së dielës.
Mazloum Abdi, udhëheqësi i Forcave Demokratike Siriane (SDF) të udhëhequra nga kurdët, ka thënë se është arritur një marrëveshje përmes ndërmjetësimit ndërkombëtar, duke siguruar evakuimin e sigurt të “dëshmorëve, të plagosurve, civilëve të bllokuar dhe luftëtarëve” nga qyteti.
Sipas raportimeve të mediave lokale, autobusë që transportonin anëtarët e fundit të SDF-së të udhëhequr nga kurdët u panë duke u larguar nga lagjja Sheikh Maqsoud, e banuar kryesisht nga kurdë.
Përplasjet më të fundit në Alepo kanë nisur në fillim të kësaj jave, pasi negociatat për integrimin e kurdëve në qeverinë e re të Sirisë arritën në një ngërç.
Të paktën 12 persona janë vrarë nga shpërthimi i dhunës, që solli gjithashtu zhvendosjen e dhjetëra mijëra civilëve, pasi ata u detyruan të largoheshin nga Sheikh Maqsoud dhe Ashrafieh.
Ushtria siriane ka bombarduar zonën të mërkurën pasdite, pasi i shpalli lagjet “zona ushtarake të mbyllura”, në përgjigje të asaj që pretendoi se ishin sulme nga grupe të armatosura në zonë.
SDF-ja e udhëhequr nga kurdët, e cila këmbëngul se nuk ka prani ushtarake në Alepo, e ka quajtur këtë një “përpjekje kriminale” për të zhvendosur me forcë banorët.
Një armëpushim ishte shpallur më herët gjatë javës, por forcat kurde refuzuan të largoheshin nga bastioni i fundit i Sheikh Maqsoud sipas kësaj marrëveshjeje.
Në mars të vitit 2025, SDF-ja e udhëhequr nga kurdët, e cila kontrollon pjesën më të madhe të verilindjes së Sirisë dhe ka dhjetëra mijëra luftëtarë, ka nënshkruar një marrëveshje për të integruar të gjitha institucionet ushtarake dhe civile në shtetin sirian.
Të dyja palët e kanë akuzuar njëra-tjetrën për përpjekje për të sabotuar negociatat që pasuan, ndërsa marrëveshja ende nuk është zbatuar pothuajse një vit më vonë.
Versioni më i fundit i marrëveshjes së armëpushimit u ndërmjetësua nga Shtetet e Bashkuara dhe fuqi të tjera botërore, pas shqetësimeve se ngërçi në Alepo rrezikonte përfshirjen e Turqisë.
Turqia mbështet qeverinë siriane dhe e konsideron milicinë kurde që dominon SDF-në si një organizatë terroriste.