-
Përktheu:
Flutura Gashi-Mehmeti
- 29 maj 2025 08:49
- Shpërndaje në:
Katër persona kanë vdekur pasi mijëra palestinezë hynë në një magazinë të Kombeve të Bashkuara në Gazë, duke shkatërruar pjesë të mureve metalike të ndërtesës në një përpjekje të dëshpëruar për të gjetur ushqim.
Dy persona janë shtypur për vdekje dhe dy të tjerë kanë vdekur nga plagët me armë zjarri pasi turma kishte hyrë me forcë në depon e Programit Botëror të Ushqimit në Deir al-Balah të mërkurën pasdite, kanë thënë zyrtarët shëndetësorë, raporton The Guardian.
Nuk është e qartë nëse forcat izraelite, kontraktorët privatë apo të tjerë kanë hapur zjarr. Një spital fushor i Kryqit të Kuq ka bërë të ditur se të lënduarit përfshinin gra dhe fëmijë me plagë me armë zjarri.
Pamjet treguan turma njerëzish që bërtisnin dhe shtyheshin në ndërtesë, ndërsa të tjerët hodhën thasë me miell dhe kuti në turmë.
“Nevojat humanitare kanë dalë jashtë kontrollit pas 80 ditësh bllokadë të plotë të të gjithë ndihmave ushqimore dhe ndihmave të tjera në Gazë”, thuhet në një deklaratë të OKB-së.
“Gaza ka nevojë për një rritje të menjëhershme të ndihmës ushqimore. Kjo është mënyra e vetme për të siguruar njerëzit se nuk do të vdesin nga uria”, thuhet më tej në deklaratë.
Një i dërguar i OKB-së e ka krahasuar ndihmën e kufizuar që lejohet në Gazë me "një varkë shpëtimi pasi anija është fundosur".
Rrethimi 11-javor dhe një bllokadë e fortë e vazhdueshme e Izraelit nënkuptojnë se shumica e njerëzve në Gazë janë shumë të uritur. Mjekët dhe punonjësit e ndihmës në territorin e shkatërruar palestinez kanë thënë për muaj të tërë se kequshqyerja po përhapet.
Furrat e bukës të operuara nga Programi Botëror i Ushqimit i OKB-së janë mbyllur për shkak të mungesës së gazit për gatim dhe çmimet po rriten për ushqimin e kufizuar të disponueshëm në dyqane dhe tregje.
Skenat kaotike të mërkurën ndodhën pasi zyrtarët shëndetësorë të Gazës thanë se të paktën një civil është vrarë dhe 48 janë plagosur në një incident të veçantë në një pikë të shpërndarjes së ushqimit në jug të territorit një ditë më parë.
Dëshmitarët e incidentit në Khan Younis kanë thënë se forcat izraelite filluan të qëllojnë pasi turma palestinezësh depërtuan nëpër gardhet rreth qendrës së menaxhuar nga një grup i mbështetur nga SHBA-ja, i zgjedhur nga Izraeli, për të dërguar ushqime në Gazë.
