Izraeli kundërshton ekipin e SHBA-së për mbikëqyrjen e Gazës

Qeveria e Izraelit ka kundërshtuar njoftimin e Shtëpisë së Bardhë për ekipin drejtues që do të luajë rol në mbikëqyrjen e hapave të ardhshëm në Gazë, ndërsa armëpushimi kalon në fazën e dytë sfiduese.

Sipas ankesës së Izraeli ndaj aleatit të tij të ngushtë në Uashington, komiteti ekzekutiv për Gazën “nuk ishte koordinuar me Izraelin dhe është në kundërshtim me politikën e tij”. 

Në deklaratën e së shtunës thuhej gjithashtu se kryeministri, Benjamin Netanyahu, i ka kërkuar ministrisë së jashtme të kontaktojë sekretarin e Shtetit, Marco Rubio.

Komiteti i shpallur nga Shtëpia e Bardhë të premten nuk përfshin asnjë zyrtar izraelit, por përfshin një biznesmen izraelit, miliarderin Yakir Gabay. Anëtarë të tjerë të shpallur deri tani përfshijnë dy nga bashkëpunëtorët më të afërt të presidentit amerikan Donald Trump, një ish-kryeministër britanik, një gjeneral amerikan dhe përfaqësues të disa qeverive të Lindjes së Mesme.

Shtëpia e Bardhë ka thënë se komiteti ekzekutiv do të zbatojë vizionin e një “Bordi të Paqes” të udhëhequr nga Trumpi, anëtarët e të cilit ende nuk janë emëruar. Shtëpia e Bardhë ka njoftuar gjithashtu anëtarët e një komiteti të ri palestinez për të drejtuar punët e përditshme të Gazës, nën mbikëqyrjen e komitetit ekzekutiv. Komiteti palestinez u mblodh për herë të parë të enjten në Kajro.

Anëtarët e komitetit ekzekutiv përfshijnë Rubion, të dërguarin e Trumpit, Steve Witkoff, dhëndrin e Trumpit, Jared Kushner, ish-kryeministrin britanik Tony Blair, drejtorin ekzekutiv të Apollo Global Management, Marc Rowan, presidentin e Bankës Botërore, Ajay Banga dhe zëvendëskëshilltarin për sigurinë kombëtare të Trumpit, Robert Gabriel.

Anëtarë të komitetit janë gjithashtu një diplomat nga Katari, një shef i shërbimeve të inteligjencës nga Egjipti dhe ministri i Jashtëm i Turqisë — të gjitha këto vende kanë qenë ndërmjetës të armëpushimit — si dhe një ministër kabineti nga Emiratet e Bashkuara Arabe.

Turqia ka marrëdhënie të tensionuara me Izraelin, por marrëdhënie të mira me Hamasin dhe mund të luajë një rol të rëndësishëm në bindjen e grupit që të heqë dorë nga pushteti dhe të çarmatoset. 

Hamasi ka thënë se do ta shpërbëjë qeverinë e tij në Gazë sapo komiteti i ri palestinez të marrë detyrën, por nuk ka treguar asnjë shenjë se do të çmontojë krahun e tij ushtarak apo forcat e sigurisë.

Pak minuta pas deklaratës së saj, Ministri i Sigurisë Kombëtare i Izraelit, i krahut të djathtë ekstrem, Itamar Ben-Gvir, në një deklaratë mbështeti Netanyahun dhe i kërkoi atij të urdhëronte ushtrinë të përgatitej për t'u rikthyer në luftë. Ministri i Financave, Bezalel Smotrich, një tjetër aleat i krahut të djathtë Netanyahu, tha në mediat sociale se "vendet që e mbajtën gjallë Hamasin nuk mund të jenë ato që e zëvendësojnë atë".

Xhihadi Islamik Palestinez, grupi i dytë më i madh militant në Gaza pas Hamasit, në një deklaratë të shtunën shprehu gjithashtu pakënaqësi me përbërjen e komitetit ekzekutiv të Gazës dhe pretendoi se ai pasqyronte "specifikimet" izraelite.

Administrata Trump tha të mërkurën se plani i armëpushimit i hartuar nga SHBA-të për Gazën tani po kalonte në fazën e tij të dytë, e cila përfshin komitetin e ri palestinez në Gaza, vendosjen e një force ndërkombëtare sigurie, çarmatimin e Hamasit dhe rindërtimin e territorit të shkatërruar nga lufta.