Zyrtarët e grupit militant Hamas kanë thënë se e kanë pranuar një propozim për armëpushim në Gazë, që do të përfshinte edhe lirimin e gjysmës së 20 pengjeve izraelite të gjalla që po mbahen ende. Sipas këtij grupi, kjo do të ishte zgjidhja me disa faza për fundin e luftës që deri tash besohet se u ka marrë jetën më shumë se 62 mijë palestinezëve në 22 muaj.
Propozimi doli nga negociatat që u mbajtën së fundmi në Kajro mes Hamasit dhe zyrtarëve ndërmjetës prej Katarit dhe Egjiptit. “Dakordimit” i parapriu edhe protesta më e madhe ndonjëherë në Izrael, me thirrjen për arritjen e një marrëveshjeje për lirimin e pengjeve.
Kryeministri Benjamin Netanyahu ka kritikuar protestën që ishte kundër mënyrës se si ai po i qaset Gazës dhe dështimit të tij për të siguruar lirimin e pengjeve të gjalla.
Propozimi i fundit me të cilin Hamasi thotë se është pajtuar është pezullimi i operimeve ushtarake për 60 ditë si rrugë drejt gjetjes së një zgjidhjeje përfundimtare, sipas burimeve egjiptiane.
Gjatë kësaj kohe, të burgosurit palestinezë duhet të lirohen në këmbim të gjysmës së pengjeve izraelite që po mbahen nga Hamasi.
Egjipti së fundmi ka marrë rol më udhëheqës në bisedime, sidomos në kohën kur Izraeli ka kërcënuar me nisjen e një ofensive të gjerë ushtarake për të marrë kontrollin e qytetit të Gazës duke shtuar rrezikun për zhvendosjen e rreth një milion palestinezëve.
Propozimi pritej t’i prezantohej Izraelit të hënën, edhe pse Netanyahu ka thënë se Izraeli më nuk është i interesuar në marrëveshje të pjesshme, por vetëm për lirimin e të gjitha pengjeve përnjëherësh, çarmatimit dhe demilitarizimit të Gazës.
Raportohet se Izraeli po e analizon propozimin e pranuar nga Hamasi për armëpushim
Izraeli po e shqyrton përgjigjen e grupit militant palestinez të Hamasit ndaj propozimit për armëpushim në Rripin e Gazës, që përfshin marrëveshjen e mundshme për pezullim 60-ditor të luftimeve dhe lirimin e gjysmës së pengjeve izraelite që mbahen ende në territor, kanë bërë të ditur dy zyrtarë izraelitë për agjencinë e lajmeve Reuters.
Përpjekjet për të ndalur përkohësisht luftimet kanë marrë vrull gjatë javës së fundit, sidomos pas njoftimit të Izraelit për një ofensivë të re që ka për synim të rimarrë kontrollin e qytetit të Gazës.
Zyrtarët e Egjiptit dhe Katarit po ndërmjetësojnë për të rifilluar bisedimet indirekte mbi planin e armëpushimit të mbështetur nga Shtetet e Bashkuara të Amerikës.
Sipas zyrtarëve të Hamasit, propozimi i ndërmjetësve arab parasheh lirimin e 200 palestinezëve të burgosur në Izrael si dhe një numri të paspecifikuar të grave dhe të miturve të burgosur në këmbim të lirimit të 10 pengjeve të gjalla izraelite dhe 18 trupave të të vrarëve që mbahen në Gazë.
Dy burime të sigurisë egjiptiane e kanë konfirmuar përmbajtjen e marrëveshjes, teksa kanë shtuar se Hamasi ka kërkuar po ashtu lirimin e qindra të burgosurve palestinezë që vijnë nga Gaza.
Propozimi gjithashtu përfshinë tërheqjen e pjesshme të forcave izraelite — të cilat aktualisht kontrollojnë rreth 75 për qind të territorit të Gazës — si dhe rritje të qarkullimit të ndihmave humanitare, për popullsinë mbi 2 milionëshe që po përballet gjithnjë e më shumë me uri ekstreme.